खोज

बुटवल, ११ चैत ।

२२ औं तिलोत्तमा गोल्डकप फुटबल प्रतियोगिताको उपाधि मनाङ मस्र्याङदी क्लबले जितेको छ ।

बुटवल देवीनगरस्थित एन्फा टेक्निल सेन्टरको मैदानमा शनिबार सम्पन्न फाइनलमा सुदूरपश्चिमलाई सडन डेथमा ९–८ गोल अन्तरले स्तब्ध बनाउंदै मनाङले उपाधि चुमेको हो । २०३३ सालदेखि सुरू भएको तिलोत्तमा गोल्डकपको उपाधि मनाङले पहिलोपटक जितेको हो ।

सुदूर पश्चिमका फागुराम थारुको प्रहार विपक्षी गोलरक्षक जियानाथ शेखले फर्काइदिएर असफल बनाइदिए भने दिपेन्द्र मलासीको प्रहार पोस्ट बाहिर गएपछि मनाङको जित निश्चित भएको थियो । यसअघि निर्धारित समयको पहिलो हाफमा मनाङका कोफी तिमोथे कोउडोले गोल गरेर टिमलाई अग्रता दिलाएका थिए । दोस्रो हाफको शुरूवातमै सुदूरपश्चिमका फागुराम थारुले गोल फर्काएपछि मनाङ दबाबमा परेको थियो । १–१ को बराबरी पछि दुबै टिमले गोल गर्न सकेनन् ।

उपाधिसंगै मनाङ भि ११ लाख ११ हजार १ सय ११ रुपैयाँ पाएको छ भने उपविजेता सुदूर पश्चिमले ५ लाख ५५ हजार ५ सय ५५ रुपैयाँमा चित्त बुझाएको छ । प्रतियोगिताका सर्वोत्कृष्ट खेलाडीले नगद एक थान स्कुटर, उत्कृष्ट फरवार्ड, गोलरक्षक, मिडफिल्डर, डिफेन्स र कोचले जनही ३० हजारका दरले नगद पुरस्कार प्राप्त गर्ने छन् । २१ औं संस्करणको उपाधि क्यामरुनको दाउफिन्स क्लबले जितेको थियो ।

बेस्ट गोलरक्षक मनाङका जियानाथ शेख, डिफेण्डर आशिस गुरुङ, बेस्ट फरवार्ड सुदूरपश्चिमका फागुराम थारु, बेस्ट मिडफिल्डर मनाङका विशन गुरुङ, बेस्ट कोच मनाङका किरण श्रेष्ठ घोषित हुँदै जनही ३० हजारका दरले नगद पुरस्कार पाए । यस्तै प्रतियोगिताका उत्कृष्ट खेलाडी सुदूरपश्चिमका फागुराम थारुलाई पनि पुरस्कृत गरिएको थियो ।