खोज

बुटवल, ४ चैत ।

बुटवलमा सुरु भएको तिलोत्तमा गोल्डकप प्रतियोगिता २०७९ को २२ औं संस्करणको उद्घाटन खेलमा सुदुरपश्चिम ११ शानदार जितसंगै अन्तिम चारमा प्रवेश गरेको छ । आयोजक रुपन्देही ११ लाई ३–१ गोल अन्तरले पराजित गर्दै सुदुरपश्चिम अन्तिम चारमा प्रवेश गरेको हो ।

सुदुरपश्चिम ११ को सेट टिमसंग रुपन्देही ११ का खेलाडीहरुको प्रदर्शनबाट दर्शक निराश भए । देबिनगरस्थित एन्फा एकेडेमी खेलमैदानमा भएको उद्घाटन खेलमा सुदुरपश्चिमको जितमा फागुराम थारु नायक रहे । शुरुवाती ९ औ मिनेटमा रुपन्देहीले पाएको राम्रो अवसर गोलमा परिणत गर्न सकेन । २० औ मिनेटमा सुदुरपश्चिम मुकुल शर्मा रुपन्देहीको डिफेन्स लाईनलाई पार गर्दै वन भर्सेस वनमा गोल गर्नबाट चुके । सुदुरपश्चिमका फागुराम थारुले ३१ औ मिनेटमा गोल गर्दै टिमलाई खेलमा अग्रता दिलाए ।

डिबक्स बाहिर पाएको फ्रिककलाई थारुले बार च्यापेर गरेको प्रहार गोलमा परिणत भयो । रुपन्देहीका गोलकिपर दिपेश परियार बिट भए । पहिलो हाफ १ गोलले पछि परेको रुपन्देहीले दोस्रो हाफमा झन फितलो प्रदर्शन गर्यो । खेलको ३८ औ मिनेटमा टिकाराज गुरुङले गरेको प्रहार सुदुरपश्चिमका गोलकिपर आकाश बुढाको हातमा गयो । खेलको ४७ मिनेटमा सुदुरपश्चिमबाट समया हार्दिक अर्को गोल थप्दै टिमको अग्रता दोब्बर बनाए । रुपन्देहीका मनोज श्रेष्ठले खेलको १६ औ मिनेटमा मिडबाट गरेको प्रहार सिधै गोलकिपरले क्याच गरे । खेलको २४ औ मिनेटमा सुदुरपश्चिमका फागु थारुले तेस्रो गोल थपे । ३० औ मिनेटमा मैदान छिरेको रुपन्देहीका बलराम न्यौपानेले डिफेन्सलाई छक्याउँदै गरेको प्रहार पोष्ट बाहिर गयो । अन्तिम मिनेटमा आयोजकबाट पेनाल्टी शुटआउटमा फोडे फोफानाले सान्त्वना गोल गरे । खेलमा सुदुरपश्चिम ११ का फागु थारु म्यान अफ द म्याचबाट पुरस्कृत भए ।

बुटवल उपमहानगरपालिकाको संरक्षकत्व, रुपन्देही जिल्ला फुटबल संघ रुपन्देहीको आयोजना, यशोदा फुड्स प्रालि, त्रिमुर्ति ईण्डष्ट्रिज प्रालीको मुख्य प्रायोजनमा दुई विभागीयसहित ८ टिमले उपाधिका लागि प्रतिस्पर्धा गर्दैछन् । प्रतियोगिताको विजेता टिमले ११ लाख ११ हजार एक सय ११ रुपैया नगद पुरस्कार पाउने छन् । गोल्डकपको उपविजेताले ५ लाख ५५ हजार ५ सय ५५ रुपैयाँ पुरस्कार प्राप्त गर्ने छ । सर्वोत्कृष्ट खेलाडीले नगद एक लाख रुपैयाँ वा एक थान मोटरसाइकल, विधागत रुपमा उत्कृष्ट फरवार्ड, गोलरक्षक, मिड फिल्डर, डिफेन्स र कोचले जनही ३० हजारका दरले नगद पुरस्कार प्राप्त गर्ने छन । प्रत्येक खेलमा म्यान अफ द म्याचलाई पनि ११ हजार १ सय ११ रुपैया पुरस्कृत गरिने छ । आईतबार हिमालयन शेर्पा र थ्री स्टार बीच खेल हुनेछ ।

एक समारोहका बीच बुटवल उपमहानगरपालिकाका नगरप्रमुख खेलराज पाण्डेले प्रतियोगिताको उदघाटन गर्दै खेलाडीलाई ब्यावसायिक बनाउने गरी सरकारबाट आवश्क लगानी गर्ने बताए । स्थानीय सरकार खेल पूर्वाधार र खेलाडीको क्षमता विकासका कार्यक्रममा जोड दिदै आएको बताए । उत्कृष्ट खेल प्रदर्शन गर्ने खेलाडीलाई नगदसहित सम्मानका कार्यक्रमहरु जोड्ने गरी अभियानहरु थालेको उनले बताए ।

कार्यक्रममा प्रदेश खेलकुद परिषद लुम्बिनीका सदस्य सचिव जयप्रकाश भट्टराई, अखिल नेपाल फुटबल संघ (एन्फा) का केन्द्रीय उपाध्यक्ष दीर्घ बहादुर केसीले कोभिड संक्रमणकै कारण रोकिएको प्रतियोगितालाई निरन्तरता दिन पाउनु विशेष भएको बताए । प्रतियोगिता सम्पन्न गर्न स्थानीय सरकारबाट ३५ लाख रुपैयाँ तथा प्रदेश खेलकुद परिषद लुम्बिनीबाट १० लाख रुपैयाँ सहयोग प्राप्त छ ।