खोज

बुटवल, ३० फागुन ।

बुटवलमा सम्पन्न १३ औ जिल्लास्तरीय राष्ट्रपति रनिङशिल्ड प्रतियोगिता २०७९ को उपाधि बुटवल उपमहानगरपालिकाले चुमेको छ । मंगलबार भएको अन्तिम दिनको खेलमा बुटवलले १६ स्वर्ण, १४ रजत र १० कास्य जित्दै उपाधि रक्षा गर्न सफल भएको हो ।

बुटवल लगातार तेस्रो पटक च्याम्पियन बनेको हो । बुटवलले मार्शल आर्टको १० स्वर्णसंगै अग्रता लिएको थियो भने तिलोत्तमा एथ्लेटिक्समा अगाडि थियो । यता तिलोत्तमा १६ स्वर्ण, ८ रजत र १४ कास्य सहित उपविजेतामा चित्त बुझायो । सैनामैना भने ४ स्वर्ण, ३ रजत र २ कास्यसहित तेस्रो भयो । सिद्धार्थनगर ४ स्वर्ण, २ वटा रजत ४ काश्य जित्दै चौथो स्थान हासिल गरेको छ । प्रतियोगिता ५ ईभेन्टमा संचालन भएको थियो । प्रतियोगितामा प्रत्येक पालिकाबाट ८० जना खेलाडी, प्रशिक्षक गरी १ हजार जना सहभागी थिए ।

एक कार्यक्रमका बीच लुम्बिनी प्रदेशका सामाजिक विकासमन्त्री चन्द्र केश गुप्ता, प्रदेश खेलकुद परिषद लुम्बिनीका सदस्यसचिव जयप्रकाश भट्टराई, रुपन्देही जिल्ला समन्वय समितिका उमाकान्त चपाई, तिलोत्तमा नगरपालिकाका नगरप्रमुख रामकृष्ण खाण, बुटवल उपमहानगरपालिकाका शिक्षा तथा जनसंख्या महाशाखाका मित्रमणि खनाल, समितिका अध्यक्ष भुपेन्द्र क्षेत्री (हरि), उपाध्यक्ष जय बहादुर बिक, सदस्य रिता चौधरीले विजेता, उपविजेता टिम तथा खेलाडीहरुलाई पुरस्कार वितरण गरेका छन् । खेल अनुशासनसंग जोडिएको भन्दै विद्यालयस्तरमा हुने खेल विकासको महत्व रहेको उनीहरुले बताए ।

छात्र÷छात्रा कबड्डीमा बुटवललाई स्वर्ण

१३ औ जिल्ला स्तरिय राष्ट्रपति रनिङशिल्ड प्रतियोगिता २०७९ अन्तर्गत मंगलबार भएको छात्रछात्रा कबडी खेलमा बुटवलले स्वर्ण जितेको छ । फाईनल खेलमा बुटवलले गैडहवालाई ५५ का बिरुद्ध १ सय १३ को अग्रता ल्याउँदै ५८ अंकले जित निकालेको हो । यसैगरी छात्रातर्फ पनि बुटवलले सियारीलाई २८ का बिरुद्ध ५० को अग्रताले २२ अंकसहित जित निकाल्दै स्वर्ण हात जितेका हो ।

१३ औ जिल्लास्तरीय राष्ट्रपति रनिङशिल्ड प्रतियोगिता २०७९ को छात्र भलिबलको उपाधि तिलोत्तमाले चुमेको छ । फाईनल खेलमा तिलोत्तमाले बुटवललाई २–० सेटले पराजित गर्दै स्वर्ण चुमेको हो । यता छात्रा भलिबलमा भने बुटवलले स्वर्ण जितेको छ । फाईनल खेलमा तिलोत्तमालाई २–० को सोझो सेटमा पराजित गर्दै बुटवलले स्वर्ण हात पारेको हो ।

यसैगरी एथ्लेटिक्सतर्फ मंगलबार भएको छात्र हाईजम्पमा बुटवलका खिमराज पौडेलले १.६४ मिटर जम्प गर्दै स्वर्ण जिते । शुद्धोधनका जीवन थारु १.६२ मिटर जम्प गर्दै रजत पदकमा चित्त बुझाए । तिलोत्तमाका राहुल चौधरी १.५६ मिटर जम्प गर्दै कास्य जिते । छात्रातर्फ सैनामैनाका सपना क्षेत्रीले १.२० मिटर जम्प गर्दै स्वर्ण जितिन् । सिद्धार्थनगरकी निशा अहिरले १.१८ मिटर जम्प गर्दै रजत र शुद्धोधनका चाद थारु तेस्रो भए ।

यसैगरी आठ मिटर छात्रमा तिलोत्तमाका शनि चौधरी स्वर्ण जिते । उनले २ मिनेट १४.७० सेकेण्डमा दुरी पार गरे । गैडहवाका रामापति चौहानले २ मिनेट १७.९४ सेकेण्डमा दूरी पार गर्दै रजत तथा बुटवलका रब िजिएमले २ मिनेट १९.०७ सेकेण्डमा दुरी पार गर्दै कास्यमा चित्त बुझाए । छात्रातर्फ तिलोत्तमाकी रजनी थारु २ मिनेट ४६.८८ सेकेण्डमा दुरी पार गर्दै स्वर्ण जिते । कन्चनकी मनिषा नाउले २ मिनेट ५८.८६ सेकेण्डमा दूरी पार गर्दै रजत तथा गैडहवाका मालती लोनियाले ३ मिनेट २.४१ सेकेण्डमा दुरी पार गर्दै कास्यमा चित्त बुझाए ।

ज्याभलिन थ्रोतर्फ छात्रमा सैनामैनाका हेमराज सेन्चुरीले ४१.७३ मिटर थ्रो गर्दै स्वर्ण जिते । तिलोत्तमाका बसन्त गुरुङले ४१.४१ मिटर थ्रो गर्दै रजत तथा बुटवलका बिशाल पराजुली ४०.७१ मिटर थ्रो गर्दै कास्य पदक जिते । छात्रातर्फ गैडहवाका लक्ष्मी भर १९.५६ मिटर थ्रो गर्दै स्वर्ण जिते । कन्चनकी गरिमा थापाले १८.९९ मिटर थ्रो गर्दै रजत तथा सैनामैनाका सुनिता चौधरीले १६.३७ मिटर थ्रो गर्दै कास्य पदक जितिन् ।

यता ४ बाई एक सय मिटर छात्रतर्फ बुटवलको दर्शन बिक, विकास कार्की, सुशान्त थापा र सुन्दर वाग्लेको टिमले स्वर्ण जित्यो । शुद्धोधनका अरुण लोध, जीवन थारु, निरज खड्का र सुरज खत्रीको टिमले रजत पदक तथा कन्चनका अभिषेक सुवेदी, क्षितिज पुन, सिजन सोनी र सोहन थापाको टिम कास्य पदकमा चित्त बुझायो । छात्रातर्फ तिलोत्तमाका रजनी थारु, रिचा थापा, सलिना थारु र रोजी थापाको टिमले स्वर्ण जिते । बुटवलका लक्ष्मी भुषाल, लक्ष्मी थापा, लक्ष्मी बलामी र अनिसा कुवरको टिम रजत तथा सिद्धार्थनगरका प्रगति ज्ञवाली, निशा यादव, आकृति पाण्डे र प्रेरणा थापा मगरको टिम कास्यमा चित्त बुझायो ।