खोज

बुटवल, २४ फागुन ।

बिभागिय टिमभित्र खेलकुद प्रतिष्पर्धा गराउँदै खेलाडी उत्पादन गर्ने उद्देश्यका साथ नेपाल आर्मीमा हुने छनौट खेल प्रतियोगिता अन्तर्गत श्री मध्य पश्चिम पृतना पृतनापति ट्रफी २०७९ शुरु भएको छ । श्री मध्य पश्चिम पृतना हेडक्वाटरको आयोजनामा रामनगरस्थित २२ नं बाहिनी अड्डामा बुधबारदेखि पृतनापति ट्रफी शुरु भएको हो ।

बुधबार भएको फुटबल प्रतियोगितामा १९ बाहिनी दल अन्तर्गत रोल्पाको बटुक दल गण विजयी हँुदै प्रधानसेनापति ट्रफीमा भाग लिने पक्का भएको छ । बटुक गणले २२ नं. बाहिनी दल अन्तर्गत कपिलबस्तुको शम्शेर दल गणलाई १–० गोल अन्तरले पराजित गर्दै प्रधानसेनापति ट्रफीमा भाग लिने पक्का गरेको हो । निक्कै प्रतिष्पर्धात्मक खेलको पहिलो हाफ गोलरहित बराबरी भएको थियो । दोस्रो हाफको ४३ मिनेटमा बटुक गणका कमल मुक्तानले एकमात्र विजयी गोल गरे ।

प्रतियोगिताको एक समारोहका बीच मध्यपश्चिम पृतना हेडक्वाटरका उपरथी यमप्रसाद ढकालले औपचारिक रुपमा उद्घाटन गरेका छन् । कार्यक्रममा २२ नं बाहिनीका बाहिनीपति सहायक रथि नवराज गुरुङ, १९ नं. बाहिनीका बाहिनीपति सहायक रथी रबिन्द्र खत्री, प्रदेश खेलकुद परिषद लुम्बिनीका सदस्य सचिव जयप्रकाश भट्टराई, जिल्ला खेलकुद विकास समितिका अध्यक्ष भुपेन्द्र क्षेत्री (हरि) ले खेल विकासमा सहकार्य जरुरी रहने बताए । जिल्ला जिल्लामा गणहरु छन । ७ युनिट मिलेर बाहिनीको संरचना बनेको छ । बाहिनीबाट छनौट भएर आएका टिम प्रधानसेनापति कप ट्रफि खेल्ने छ ।

नेपाली आर्मी भित्र आन्तरिक छनौट खेल अन्तर्गत प्रतियोगिता गरिदै आएको छ । मध्यपश्चिम पृतना हेडक्वाटरमा एथलेटिक्स, स्विमिङ, भलिबल लगायतका ७ विधामा खेलहरु शुरु भएको छ ।