खोज

बुटवल, १४ फागुन ।

बुटवल उपमहानगरपालिका वडा नं. ३ को वडा कार्यालयबाट आरके तेक्वान्दो एकेडेमीलाई खेलकुद सामग्री वितरण गरिएको छ । आईतबार एक समारोहका बीच वडाअध्यक्ष विष्णु ढकाल, वडा सदस्य हरिनारायण मिश्र, पवित्रा देवि श्रेष्ठ, रतिमाला बिक, वडा सचिव संगिता घिमिरे, तिनाउ एकता टोल संस्थाका अध्यक्ष जगत बहादुर श्रेष्ठले सामूहिक रुपमा एकेडेमीका अध्यक्ष राजकुमार पाण्डेलाई खेलकुद सामग्री हस्तान्तरण गरेका हुन् ।

खेल र खेलाडीलाई प्रोत्साहन हुने गरी करीब ३० हजार रुपैयाँ बराबरको चेस्ट प्याड, हेल्मेट, लेगगार्ड, हेण्ड ग्लब्स, कोन लगायत तेक्वान्दो सामग्रीहरु वितरण गरिएको वडा अध्यक्ष विष्णु ढकालले बताए । युवा तथा बालबालिका खेलकुद सामग्री शिर्षकबाट बजेट बिनियोजन गरी वडास्तरमा खेलकुद विकासको लागि वार्षिक योजना बनाएर अघि बढेको बताए । लामो समयदेखि अलपत्र रहेको बुटवल बहुमुखी क्याम्पसको खेलमैदान मर्मत गर्न समिति गठन प्रक्रियामा रहेको र ३ लाख रुपैया बजेट बिनियोजन भएको उनले बताए । कार्यपालिका बैठकबाट बजेट बिनियोजन भएको छ ।

यो मैदान निर्माण भएसंगै वडा नं. ३, ४, ५ र ६ का खेलाडीहरुलाई उपयोग हुने उनले बताए । जनसहभागिता सहितको योजना अघि बढाईएको उनले बताए । यसैगरी यो वर्षबाट वडा अध्यक्ष कप प्रतियोगिता आयोजना गर्न १ लाख ८० हजार रुपैयाँ तथा खेलाडी सम्मानका लागि वार्षिक १ लाख रुपैयाँ बजेट बिनियोजन गरिएको उनले बताए । १२ वटा टोल सहित जनप्रतिनिधिलाई समेटेर वडाकप प्रतियोगिता गर्ने तयारीमा रहेको उनले बताए । खेल सामग्रीका लागि बर्सेनि ७५ हजार रुपैयाँ बराबरको खेलकुद सामग्री वितरण गर्दै आएको उनले बताए । खेलमार्फत आफनो ठाउको पहिचान दिलाउने खेलाडीलाई सम्मान गरि प्रोत्साहित गर्ने कामलाई समेत अघि बढाएको उनले बताए ।

बुटवल उपमहानगरपालिकाभित्रका नीजि तथा सामुदायिक विद्यालयहरुमा तेक्वान्दो खेल विकास गर्ने लक्ष्यसहित अघि बढेको एकेडेमीका अध्यक्ष राजकुमार पाण्डेले बताए । सामुदायिक विद्यालयहरुमा निःशुल्क तेक्वान्दो प्रशिक्षण गराउने लक्ष्यसहित अघि बढेको एकेडेमीका राजकुमार पाण्डेले बताए । युवाहरुलाई कुलतमा लाग्नबाट बचाउदै खेलकुदमा आवद्घ गराउने लक्ष्यसहित लागेको उनले बताए । खेल मैदानको अभावलाई समेत सम्बोधन हुनेमा आशावादी रहेको बताए ।