खोज

बुटवल, १० फागुन ।

नेपाल लनटेनिसमा १ नम्बर वरियतामा रहेका प्रदिप खड्काले बुटवलमा उपाधि चुम्दै आफनो प्रदर्शनलाई कायम राखे । लनटेनिसमा उदाउँदै गरेका प्रदिप जुनियर खेलबाट आफनो करियर शुरु गरेका हुन् । नेपालको सिनियर टिममा पुग्न धेरै मेहनत गरेको उनी बताउँछन् । बुटवलको दोस्रोपटक उपाधि चुम्दै गर्दा उनले बुटवलको लनटेनिस कोर्ट भाग्यमानी भएको बताए । ‘मलाई यो कोर्ट मनपर्छ’– उनले थपे –‘ यही कोर्टमा दुई पटक च्याम्पियन बने ।’ यसअघि दोस्रो बुटवल खुला पनि उनले उपाधि चुमेका थिए । केही समय खेलकै दौरान विदेश रहेका उनले नेपालमा भएका अधिकांश प्रतियोगिता खेल्न पाएनन् । ‘खेल अभ्यासकै क्रममा माल्दिभमा केही वर्ष बसे’–उनले भने । नेपाल फर्किएर उनले आफ्नो खेलकौशलकै कारण नवौ राष्ट्रियमा ३ स्वर्ण पदक जिते । लगन र अनुभवले भरिएका खड्का यो पटक पाँचौ खेल्ने क्रममा भने शारीरिक रुपमा फिट थिएनन् । ‘३ दिन देखि फिजिकल फिट थिईन’– उनले भने । असहज हुँदाहँुदै मैदानमा उत्रेका उनी विजेता बन्दा धेरै खुशी देखिए । पहिलो सेट पछि परेका उनी लगातार २ सेटमा जित्दै च्याम्पियन बने । पहिलो सेटमा केही टेक्निकल समस्या आएपछि उनी त्यो सेटमा पछि परे । ‘मेन्टल गेम भयो, मैले गिभ अप गरे’– उनले भने ।

बुटवलमा प्रदिप र रितिकको चौथो भेट हो । बुटवलमै भएको दोस्रो खुला लन टेनिसमा सेमीफाईनलमा रितिकसंग पराजित भएका प्रदिप त्यसबाहेक पोखरामा माछापुच्छे ओपन, विर गणेशमान र यो पाँचौ बुटवलमा समेत गरी ३ पटक जित निकालेका छन् ।

यता हारपछि रितिक रानाले फिजिकल फिट नहुँदा शतप्रतिशत खेल्न नसकेको बताए । “ब्याक पेनको कारण पूरा अफोर्ड दिन सकेन”– उनले भने । प्रतिपक्ष राम्रो खेलाडी हँुदा फाईनल खेल निक्कै राम्रो भएको उनले प्रतिक्रिया दिए । ढाडको समस्याकै कारण आफु हार्नुपरेको उनले बताए । उनी नेपालको तेस्रो वरियतामा रहेका छन् । यो खेलसंगै अब उनी दोस्रोमा चढ्ने छन् ।