खोज

बुटवल, १० फागुन ।

बुटवलमा सम्पन्न प्रथम मेयर कप तथा पाँचौ राष्ट्रिय खुला लन टेनिस प्रतियोगिता २०७९ को पुरुष÷महिला एकलतर्फको उपाधि प्रदिप खड्का र अभिलाषा विष्टले चुमेका छन् । देविनगरस्थित लनटेनिस कोर्टमा बुधबार भएको पुरुषतर्फको फाईनल खेलमा अघिल्लो वर्षका विजेता रितिक रानालाई २–१ को सेटमा पराजित गर्दै प्रदिपले उपाधि चुमेका हुन् ।

प्रतिष्पर्धात्मक खेलको पहिलो सेटमा २ अंकको अग्रता लिएका प्रदिप खड्कालाई पछि पार्दै रितिक रानाले सेट ६–३ ले आफनो नाममा पारे । तर दोस्रो र तेस्रो सेटमा भने प्रदिपले खेलमा कम ब्याक गरे । उनले लगातार ६–३, ६–२ को सेटमा जित निकाल्दै दोस्रो पटक उपाधि चुमे । यता ढाडको चोट ब्यहोरेका रितिक खेलमा असहज महसुस गरे ।

यता महिला सिङ्गलको उपाधि अभिलाषा बिष्टले चुमिन् । गतवर्ष उपविजेतामा चित्त बुझाएकी बिष्टले यसवर्ष च्याम्पियन बनिन् । एक नम्बर बरियतामा रहेकी नेपाल आर्कीका खेलाडी समेत रहेकी विष्टले माहिका रानालाई फाईनलमा ६–२, ६–० को सोझो सेटमा पराजित गर्दै उपाधि आफनो नाममा लेखाईन् ।
यसैगरी ३५ वर्ष उमेर समूह पुरुष एकलको उपाधि सन्तोष खत्रीले चुमे । बुधबार भएको फाईनल खेलमा खत्रीले सिमान्त गुरुङलाई ६–२, ७–५ को सेटमा पराजित गर्दै उपाधि जिते ।

यसैगरी ५५ वर्ष उमेर पुरुष एकलको उपाधि विमल गुरुङले हात पारेका छन् । फाईनलमा कमल थापालाई ६–३, ६–३ को सेटमा पराजित गर्दै गुरुङले उपाधि चुमे । एक कार्यक्रमका बीच फाईनल प्रतियोगिताका विजेता, उपविजेता खेलाडीहरुलाई बुटवल उपमहानगरपालिकाका नगरप्रमुख खेलराज पाण्डे, श्री २२ नं. बाहिनीका उपरथी नवराज गुरुङ, नेपाल टेनिस संघका निवर्तमान अध्यक्ष मनोज शम्सेर राणा, रुपन्देही लनटेनिस संघका अध्यक्ष गोपाल ज्ञवाली, उपाध्यक्ष डा. मनोज ढुंगाना, निवर्तमान अध्यक्ष सञ्जय प्रकाश श्रेष्ठ, सल्लाहकार मनोज बस्नेतले पुरस्कार वितरण गरेका छन् ।