खोज

बुटवल, ६ फागुन ।

शनिबार बुटवलमा भएको हाफ म्याराथनमा त्रिभुवन आर्मी क्लबका गजिन्द्र राई विजेता बनेका छन । राईले १ घण्टा ६ मिनेट ५० सेकेण्डमा २१ किलोमिटरको दुरी पार गर्दै उपाधि चुमेका हुन । उपाधिसंगै उनले नगद ४० हजार रुपैयाँ, मेडल, प्रमाणपत्रबाट पुरस्कृत भए । नेपाली सेना स्थापनाको ३ सय ६० औ वार्षिक उत्सव तथा महाशिवरात्री २०७९ को अवसरमा खेलकुदको विकास तथा आफनो स्वस्थ्यको लागि दौड भन्ने नारासहित आयोजना गरिएको प्रतियोगितामा आर्मीकै सुशिल कुमार शाही १ घण्टा ७ मिनेट ४६ सेकेण्डमा दुरी पार गर्दै दोस्रो भए । उनी नगद २५ हजार रुपैया, मेडल, प्रमाणपत्रबाट पुरस्कृत भए । आर्मीकै जितेन्द्र दनुवार १ घण्टा १९ मिनेट ५७ सेकेण्डमा दुरी पार गर्दै तेस्रो बन्दै नगद १५ हजार रुपैया, मेडल, प्रमाणपत्रबाट पुरस्कृत भए ।

मध्य पश्चिम पृतना र श्री नं. २२ बाहिनी अड्डाले आयोजना गरेको खुल्ला हाफ म्याराथान पुरुष तथा १० किलोमिटर (महिला÷पुरुष) दौड प्रतियोगिताको पुरुष १० किलोमिटर दौड त्रिभुवन आर्मी क्लबका खगेन्द्र रानाभाट ३१ मिनेट ३७ सेकेण्ड ४२ मा दुरी पार गर्दै उपाधि चुमेका छन् । एपीएफका सन्जित नेपालीले ३४ मिनेट ४७ सेकेण्ड ५७ मा दुरी पार गर्दै दोस्रो भए । महाबिर गणका रमेश सिजापति ३६ मिनेट ४२ सेकेण्ड १५ मा दुरी पार गर्दै तेस्रो भए । १० किलोमिटर महिला दौड त्रिभुवन आर्मी क्लबकी सिपाही गिता बिकले ४० मिनेट १५ सेकेण्ड ०५ दुरी पार गर्दै प्रथम भइन् । आर्मीकै सिपाही निर्मला केसी ४१ मिनेट १५ सेकेण्ड २० मा दुरी पार गर्दै दोस्रो भइन् । यसैगरी महेन्द्र दल गणकी सिपाही धनमाया बोहराले ४३ मिनेट ४६ सेकेण्ड १५ मा दुरी पार गर्दै तेस्रो स्थान हासिल गरिन् । प्रतियोगिताको प्रथम, द्वितीय र तृतीय खेलाडीहरुले क्रमशः नगद १५ हजार, १० हजार र ५ हजार रुपैयासहित मेडल, प्रमाणपत्रबाट पुरस्कृत भए ।

एक कार्यक्रमका बीच मध्य पश्चिम पृतना हेड क्वाटरका पृतनापति उपरथी याम प्रसाद ढकाल, बुटवल उपमहानगरपालिकाका नगरप्रमुख खेलराज पाण्डे, श्री नं. २२ बाहिनी अड्डाका बाहिनीपति सहायक रथी नवराज गुरुङले विजेता, उपविजेता खेलाडीहरुलाई पुरस्कृत गरेका छन् । कार्यक्रम संयोजक उज्वल केसीले नागरिक सैनिक बीचको सम्बन्ध सुमधुर बनाउने एउटा माध्यमका रुपमा खेल आयोजना गरिएको बताए । कार्यक्रममा ४ सय बढी खेलाडीहरु सहभागी रहेको समन्वयकर्ता नरेश अर्यालले बताए ।