खोज

स्वस्तिक श्रेष्ठ
बुटवल, २७ माघ ।

रुपन्देहीमा सम्पन्न जिल्ला नकआउट लिग छनौट फुटबल प्रतियोगिता २०७९ मा विजेता बन्दै सालझण्डीको विश्व शान्ति युवा क्लब र उपविजेता बन्दै मणिग्रामको हिमाल युथ क्लब छनौट भएका छन् ।

सिद्धेश्वर खेलमैदानमा शुक्रबार भएको फाईनल खेलमा हिमाल युथ क्लबलाई ट्राईबेकरमा ५–४ गोल अन्तरले पराजित गर्दै विश्व शान्ति युवा क्लब विजयी भएको हो । निर्धारित समयको ४२ मिनेटमा विश्वशान्तिका समिर श्रेष्ठले गोल गर्दै खेलमा अग्रता लिएका थिए । हिमाल युथ क्लबका अमित क्षेत्रीले ४४ मिनेटमा बराबरी गोल फर्काए ।

प्रतियोगितामा उत्कृष्ट किपर विश्वशान्तिका आयुष राना, हिमाल युथ क्लबका गोविन्द थापा उत्कृष्ट डिफेन्स, हिमाल युथकै अमित क्षेत्री उत्कृष्ट फरवार्ड तथा विश्वशान्तिका लोक बहादुर बुढामगर प्रतियोगिताको सर्वोत्कृष्ट खेलाडी घोषित हुँदै पुरस्कृत भए ।

एक समारोहका बीच प्रदेश खेलकुद विकास परिषद लुम्बिनीका सदस्य सचिव जयप्रकाश भट्टराई, जिल्ला खेलकुद विकास समितिका अध्यक्ष भुपेन्द्र बहादुर क्षेत्री (हरि), खेलप्रेमी टेक बहादुर थापा, जिल्ला फुटबल संघका अध्यक्ष लोक पुनमगरले विजेता, उपविजेता टिम तथा उत्कृष्ट खेलाडीलाई पुरस्कार वितरण गरेका छन् ।

कार्यक्रममा प्रदेश खेलकुद विकास परिषद लुम्बिनीका सदस्य सचिव जयप्रकाश भट्टराईले लुम्बिनी खेलकुदको हब भएको बताए । यहाँ हुने खेल गतिविधि खेल विकासको आधार भएको भन्दै खेलकुद विकासमा सबै क्षेत्रको सहकार्य जरुरी रहेको बताए ।

कार्यक्रममा जिल्ला फुटबल संघका अध्यक्ष लोक पुनमगरले भौगोलिक रुपमा ठूलो क्षेत्र रहेको जिल्लाका अधिकाश उत्कृष्ट टिमहरुले भाग लिएको बताए । दुई टिम छनौट भएर जिल्लाको सदस्य भएसंँगै थप जिम्मेवारी लिएर अघि बढ्नुपर्ने उनले बताए । एन्फामा आवद्ध रहेका ४७ वटा जिल्लाहरुमध्ये रुपन्देही उत्कृष्ट हुनेमा आशावादी रहेको उनले बताए । फुटबलमा टिम वर्क मुख्य भएको भन्दै लिगमा समेत उत्कृष्ट प्रदर्शन हुने उनले बताए । रुपन्देहीमा लिग चरणमा खेलबाट उत्कृष्ट प्रदर्शन गर्ने खेलाडीहरुबाट रुपन्देही–११ को टिम बनाउने गरी अभियान समेत जिल्ला फुटबल संघ अघि बढेको उनले बताए ।