सामग्री खोज्नुहोस्

काठमाडौँ ।

प्रतिनिधिसभाको आजको बैठकमा सांसदहरूले समयसामयिक विषयमा सदनमार्फत सरकारको ध्यानाकर्षण गराएका छन् । बैठकको शून्य समयमा उनीहरुले दन्त स्वास्थ्य सेवालाई प्राथमिकता दिन र स्थानीयस्तरसम्म विस्तार, चाडबाडको तथा विपद्को बेला महङ्गो हुने हवाई भाडादर नियन्त्रण गर्नुपर्नेलगायत माग राखे ।

सांसद अमृता धितालले दन्त स्वास्थ्यले अझै पनि ग्रामीण क्षेत्रसम्म प्राथमिकता पाउन नसकेको बताउँदै यस बारेमा सरकारको ध्यान जानुपर्ने उल्लेख गरिन । उनले मुखको क्यान्सर नियन्त्रणका लागि पनि दन्त स्वास्थ्य प्रभावकारी बनाउनुपर्ने धारणा राखिन ।

सांसद डा अच्युतम लामिछानेले भोटकोशी बाढी प्रभावित क्षेत्रमा हालसम्म सरकारले गरेका कामको जानकारी सनदलाई दिनुपर्ने भन्दै अब पुनःसंरचनाका लागि कुनै कमी हुन नदिने कार्ययोजनासहित काम गर्न सरकारसँग आग्रह गरे । सांसद अनुष्का श्रेष्ठले पर्यटन नीतिमा भएका व्यवस्था कार्यान्वयन गर्न सरकारको ध्यानाकर्षण गराइन ।

सांसद अम्बिका देवी सङ्ग्रौलाले अमेरिकाको ‘ग्रेजोन मिडिया’ले नेपालका सम्बन्धमा प्रकाशित गरेको समाचारका बारेमा स्पष्ट पार्न सरकारको ध्यानाकर्षण गराइन । सांसद अरविन्द झाले निजगढ विमास्थल निर्माणमा ढिलाइ हुँदा लागत बढेको उल्लेख गर्दै तत्काल कामलाई तीव्र बनाउन र विस्थापित समुदायको माग सुनुवाई गर्न माग गरे ।

सांसद अर्जुननरसिंह केसीले भोटेकोशी बाढी प्रभावितहरूलाई नजिकिँदै गरेको चाडवाड अघि व्यवस्थित गर्न आग्रह गरे । सांसद अशोक चौधरीले सङ्घीयताको अनुभूतिका लागि जनताको घरदैलोमा विकास र शान्ति सुरक्षाको व्यवस्था गर्नुपर्ने बताए ।

सांसद आकृति अवस्थीले चाडबाडको मुखमा आन्तरिक हवाई उडानको भाडादर महङ्गो हुने बताउँदै सो सम्बन्धमा सरकारको ध्यानाकर्षण गराइन । सांसद आनन्दबहादुर चन्दले स्वास्थ्य बिमा सर्वसाधारण नागरिकको उपचार पाउने ठूलो आधार भएको उल्लेख गर्दै यसलाई स्थनीयस्तरसम्म र अनौपचारिक क्षेत्रसम्म विस्तार गर्न माग गरे । सांसद आरेन राईले जेनजी आन्दोलनका घाइतेका माग सम्बोधन गर्न सरकारसँग आग्रह गरे ।

बैठकमा आशा झा, आशिष गजुरेल, आशिका तामाङ, उत्तमप्रसाद पौडेल, एलिजा गुरुङ, एसुदाकुमारी बराल, कन्हैया बनिया, करिष्मा कठरिया, कविन्द्र बुर्लाकोटी, कामिनी कुमारी, कुलभक्त शाक्य, कुशुम महर्जन, कृष्णहरि बुढाथोकी, कोमल ज्ञवाली, क्रान्तिशिखा धिताल, खगेन्द्र सुनार, खिमा विक, खेमराज कोइराला, गणेश कार्की, गणेश धिमाल, गणेश पौड्याल, गणेशबहादुर विश्वकर्मा, गुरुप्रसाद बराल, गोपाल शर्मा, गोविन्द पन्थी, गङ्गा छन्त्याल, गङ्गादेवी श्रेष्ठ, गङ्गालक्ष्मी अवाल, चन्दनकुमार सिंहलगायत सांसदहरूले समसामयिक विषयमा सरकारको ध्यानाकर्षण गराए ।

उनीहरूले होल्डिङ सेन्टरमा बसेका भोटेकोशी प्रभावितका लागि तत्काल पुनःस्थापनाको व्यवस्था गर्नुपर्ने, प्रधानमन्त्रीको संयुक्त राष्ट्रसङ्घको महासभामा हुने आसन्न भ्रमण बारेमा सदनलाई जानकारी दिनुपर्नेलगायत विषयमा सभामुखमार्फत सरकारसँग माग गरे ।