सामग्री खोज्नुहोस्

काठमाडौं । भोटेकोशी बाढीपछि नेपालमा जारी खोजी, उद्धार तथा राहत अभियानबीच अमेरिकी विदेशमन्त्री मार्को रुबियोले राष्ट्रिय स्वतन्त्र पार्टी ९रास्वपा० का सभापति रवि लामिछानेलाई फोन गरेपछि नेपाली राजनीतिक वृत्तमा नयाँ चर्चा सुरु भएको छ। सोमबार भएको टेलिफोन वार्तामा रुबियोले भोटेकोशी बाढीबाट भएको जनधनको क्षतिप्रति गहिरो दुःख व्यक्त गर्दै नेपाल सरकार र नेपाली जनताप्रति अमेरिकी ऐक्यबद्धता जनाएका थिए। संकटको यस घडीमा नेपाललाई थप सहयोग गर्न अमेरिका तयार रहेको उनले बताएका थिए।

जवाफमा लामिछानेले नेपाल सरकारले खोजी, उद्धार तथा राहतका लागि उपलब्ध सबै स्रोतसाधन परिचालन गरिरहेको जानकारी गराएका थिए। उनले नेपालमा रहेका विदेशी नागरिकको सुरक्षा तथा संरक्षणप्रति नेपाल प्रतिबद्ध रहेको बताउँदै अमेरिकी सहयोगका लागि रुबियोलाई धन्यवाद दिएका थिए। तर, अमेरिकी विदेशमन्त्री रुबियोले प्रधानमन्त्री बालेन्द्र शाहसँग प्रत्यक्ष कुराकानी नगरी रास्वपा सभापति लामिछानेलाई फोन गरेको विषयले भने राजनीतिक चासो बढाएको छ। बाढीपछि विभिन्न देशका राष्ट्रप्रमुख, सरकार प्रमुख तथा उच्च अधिकारीहरूले प्रधानमन्त्री शाहलगायत नेपाली नेतृत्वसँग सम्पर्क गरिरहेका छन्। परराष्ट्र मन्त्रालयका अनुसार प्रधानमन्त्री शाह र परराष्ट्रमन्त्री शिशिर खनालले पनि विभिन्न देशका समकक्षी तथा विदेशी नेताहरूबाट समवेदना, ऐक्यबद्धता र सहयोगका सन्देश प्राप्त गरिरहेका छन्।

यही पृष्ठभूमिमा अमेरिकी विदेशमन्त्रीजस्तो उच्च तहका अधिकारीले प्रधानमन्त्रीसँग नभई सत्तारूढ दलका सभापति रवि लामिछानेलाई फोन गर्नु राजनीतिक रूपमा अर्थपूर्ण भएको भन्दै सामाजिक सञ्जाल र राजनीतिक वृत्तमा चर्चा भइरहेको छ।कतिपयले यसलाई लामिछानेको राजनीतिक प्रभाव तथा अन्तर्राष्ट्रिय सम्पर्कसँग जोडेर हेरेका छन्। केहीले भने विगतमा रुबियोसँग प्रधानमन्त्री शाहको भेटवार्तासम्बन्धी प्रसंगलाई समेत अहिलेको फोनसँग जोडेर प्रश्न उठाइरहेका छन्। तर प्रधानमन्त्री शाहले विगतमा रुबियोलाई भेट्न नमानेकै कारण रुबियोले अहिले लामिछानेलाई फोन गरेको हो भन्ने दाबीको कुनै आधिकारिक पुष्टि भएको छैन। त्यसैले यसलाई अहिले राजनीतिक अड्कलबाजी र चर्चाका रूपमा मात्र लिन सकिन्छ।

यता, अमेरिकी विदेश मन्त्रालय वा रुबियोको तर्फबाट सार्वजनिक रूपमा जारी विवरणमा फोनको राजनीतिक कारणबारे केही उल्लेख गरिएको छैन। सार्वजनिक विवरणअनुसार वार्ताको मुख्य विषय भोटेकोशी बाढी, खोजी तथा उद्धार, नेपालमा रहेका विदेशी नागरिकको सुरक्षा र नेपाललाई थप अमेरिकी सहयोग नै रहेको देखिन्छ। यसबीच नेपालमा बाढीपछिको खोजी तथा उद्धार अभियान जारी छ। सरकारले उपलब्ध सबै स्रोतसाधन परिचालन गरिरहेको छ भने भारत, चीन, दक्षिण कोरिया, यूएई, मलेसियालगायत देशका उद्धार टोलीसमेत प्रभावित क्षेत्रमा परिचालित छन्।

रुबियोले लामिछानेलाई गरेको फोन अहिलेका लागि विपद्का बेला अमेरिकी ऐक्यबद्धता र सहयोगको सन्देशका रूपमा बुझिएको छ। तर यसले नेपालको बदलिँदो राजनीतिक तथा कूटनीतिक समीकरणमा कुनै ठूलो संकेत गर्छ कि गर्दैन भन्ने विषय भने आगामी दिनमा थप स्पष्ट हुँदै जानेछ।