खोज

काठमाडौँ ।

आगामी फागुन २१ गते हुने प्रतिनिधिसभा निर्वाचनका लागि रौतहट–१ बाट मनोनयन दर्ता गरेका नेपाल कम्युनिष्ट पार्टी (नेकपा) का नेता एवं पूर्वप्रधानमन्त्री माधव नेपालविरुद्ध उजुरी परेको छ ।

निर्वाचन आयोगका अनुसार बुधबार नेपालविरुद्ध पतञ्जली जग्गा प्रकरणमा अदालतमा मुद्दा विचाराधीन रहेको भन्दै उजुरी परेको हो । उनीविरुद्ध उक्त प्रकरणमा विशेष अदालतमा भ्रष्टाचार मुद्दा विचाराधीन रहेकाले उम्मेदवार हुन अयोग्य रहेको दाबी गरिएको छ ।

यस्तै, नागरिक उन्मुक्ति पार्टी नेपालका कैलाली–१ का उम्मेदवार रेशमलाल चौधरीविरुद्ध पनि उजुरी दर्ता भएको छ । चौधरी टीकापुर हत्याकाण्डमा सर्वोच्च अदालतबाट दोषी ठहर भएका व्यक्ति हुन् । उनलाई राष्ट्रपतिबाट सजाय माफी दिइएको थियो ।

उक्त उजुरी दर्ताको समय आज बिहान १० बजेदेखि दिउँसो ३ बजेसम्म तोकिएकोमा सो अवधिमा पाँच उम्मेदवार विरुद्ध उजुरी परेको आयोगका सूचना अधिकारी सुमन घिमिरेले जानकारी दिएका छन् ।

सुनसरी–२ बाट रास्वपा उम्मेदवार लालविक्रम थापा, भक्तपुर–२ बाट रास्वपा उम्मेदवार राजीव खत्री, र भक्तपुर–२ बाटै नेपाल जनसेवा पार्टीकी उम्मेदवार जानुका पाठकविरुद्ध उजुरी दर्ता भएको छ ।

भक्तपुरमा २, रौतहटमा १, सुनसरीमा १ र कैलालीमा १ उजुरी परेको छ । भोलिसम्ममा उजुरीको छानबिन टुंग्याउने कार्यसूची रहेको निर्वाचन आयोगले जनाएको छ ।