खोज

काठमाडौँ ।

आगामी प्रतिनिधि सभाको निर्वाचनका लागि प्रत्यक्षतर्फ उम्मेदवार टुंगो लगाउन नेकपा (एमाले) ले सचिवालय बैठक बोलाएको छ ।

एमाले अध्यक्ष केपी शर्मा ओलीले शनिबार दिउँसो १ बजे बस्ने गरी सचिवालय बैठक आह्वान गरेका हुन् । माघ ३ गते दिउँसो १ बजे एमाले केन्द्रीय कार्यालय, च्यासलमा सचिवालय बैठक बस्ने प्रचार तथा प्रकाशन विभागका संयोजक मीनबहादुर शाहीले जानकारी दिए ।

आउँदो फागुन २१ गते हुने निर्वाचनका लागि माघ ६ गते उम्मेदवारी दर्ता गर्ने समय तोकिएको छ । त्यसअनुसार एमालेले शनिबार उम्मेदवारको नामावली अन्तिम रूप दिने तयारी गरेको शाहीले बताए ।

एमालेको निर्वाचन क्षेत्रीय समन्वय कमिटीले सिफारिस गरेका उम्मेदवारको नामावली जिल्ला कमिटी हुँदै प्रदेश कमिटीमार्फत केन्द्रमा पठाइसकिएको छ । सिफारिस भएका उम्मेदवारमा अध्यक्ष ओलीसहित ३५ जना सर्वसम्मत भइसकेको प्रचार विभाग प्रमुख शाहीले जानकारी दिए ।

एमाले आगामी प्रतिनिधि सभा निर्वाचनमा १६५ वटै निर्वाचन क्षेत्रमा उम्मेदवार खडा गर्ने तयारीमा छ । ‘अहिलेसम्म कुनै पार्टीसँग चुनावी गठबन्धन गर्ने निर्णय भएको छैन, त्यसैले सबै निर्वाचन क्षेत्रमा उम्मेदवार बनाउने गरी अघि बढेका छौँ,’ उनले भने ।

उम्मेदवारी दर्ता प्रक्रिया सुरु हुने भएकाले माघ ३ मै उम्मेदवार टुंग्याउने तयारी गरिएको पनि जानकारी दिइएको छ । यसअघि एमाले केन्द्रीय कमिटीको बैठकले निर्वाचनमा उम्मेदवार टुंग्याउने जिम्मा सचिवालयलाई दिएको थियो ।