खोज

बर्दघाट, १५ पुस ।

पश्चिम नवलपरासीको सुनवलमा औद्योगिक ब्यापार मेलाको आयोजना गरिने भएको छ । शुक्रबार पत्रकार सम्मेलनको आयोजना गरी मेला आयोजनाको बारेमा जानकारी गराइएको हो ।

सुनवल उद्योग वाणिज्य सँघको आयोजनामा आगामी माघ १० गतेदेखि २२ गतेसम्म सोमनाथ बजार परिसरमा दोश्रो सुनवल औद्योगिक ब्यापार मेला २०७९ को आयोजना गरिएको हो ।

सुनवल उद्योग वाणिज्य सँघका अध्यक्ष रमेश कर्माचार्यले मेला आयोजनाको बारेमा जानकारी गराएका थिए । १३ दिनसम्म सँचालन हुने मेलामा करिव एक लाख दर्शकले अवलोकन गर्ने अपेक्षा रहेको पत्रकार सम्मेलनमा जानकारी गराइएको थियो । नेपालका घरेलु, साना, मझौला तथा ठूला उद्योगका अतिरिक्त विदेशी वस्तुहरु र पहाडी, कृषिजन्य उत्पादनको प्रदर्शनी गरिने जानकारी गराइएको थियो ।

करिव २ सय स्टल रहने मेलामा प्रदर्शनी तथा विक्री कक्ष, साँस्कृतिक तथा साँगितिक क्षेत्र, बाल उद्यान एवं मनोरन्जन र खानपान क्षेत्र गरी ४ क्षेत्रमा छुट्याइएको छ । वृद्धहरुलाई निःशुल्क प्रवेशको ब्यवस्था मिलाईएको मेलामा ४० वटा स्टल सँघ आवद्ध साना उद्योग र कृषि क्षेत्रलाई छुट्याइएको सँघका महासचिव तेज प्रसाद भण्डारीले जानकारी दिए ।

करिव ५५ लाख रुपैयाँ खर्च अनुमान गरिएको महोत्सवमा करिव १० करोड रुपैयाँको कारोवार हुने आँकलन आयोजकको रहेको छ । सुनवल उद्योग वाणिज्य सँघ मुख्य आयोजक रहेको मेलामा सुनवल नगरपालिका, जिल्ला समन्वय समिति नवलपरासी, नेपाल उद्योग वाणिज्य महासँघ लुम्बिनी प्रदेशसँग समन्वय गरिएको पत्रकार सम्मेलनमा जानकारी गराइएको थियो ।