खोज

पाल्पा, २३ मंसिर ।

१६ वटा विभिन्न पार्टी तथा समूहहरू मिलेर बनेको नेपाली कम्युनिष्ट पार्टीले मंगलबार तानसेनमा भव्य एकता सन्देश सभा सम्पन्न गरेको छ। नेता तथा कार्यकर्तासहित हजारौँ जनताको सहभागिता रहेको उक्त कार्यक्रममा पार्टी एकताको सन्देश प्रवाह गरिएको थियो।

कार्यक्रमलाई सम्बोधन गर्दै पार्टीका नेता प्रकाश ज्वालाले कांग्रेस–एमाले गठबन्धनबाट निर्माण भएको दुई तिहाइको सरकारले अहंकार, घमण्ड, भ्रष्टाचार र कुशासन बढाएको आरोप लगाए। उनले अन्याय–अत्याचार चरम अवस्थामा पुगेका कारण जनविद्रोह जन्मिएको बताउँदै तत्कालीन प्रधानमन्त्री केपी शर्मा ओली स्कुले विद्यार्थी हत्याकाण्डका जिम्मेवार रहेको र उहाँमाथि कानुनी कारबाही हुनुपर्नेमा जोड दिए।

नेता ज्वालाले आगामी मंसिर २७ देखि २९ मा हुने एमालेको ११औँ महाधिवेशनपछि “कित ओली पराजित हुन्छन्, कित एमाले फुट्छ” भन्दै दुवै सम्भावना एमालेभित्र रहेको दाबी गरे। उनले टुक्रिएको एमाले अन्ततः नेपाली कम्युनिष्ट पार्टीमै एकीकृत हुने विश्वास व्यक्त गरे।

त्यसैगरी, एकता सभामा सम्बोधन गर्दै नेपाली कम्युनिष्ट पार्टीका नेता तथा पुर्व उद्योगमन्त्री सोम प्रसाद पाण्डेले देशमा ठूलो संख्यामा कम्युनिष्ट विचारधारा मान्ने नागरिक रहेको उल्लेख गर्दै सबै कम्युनिष्ट धाराहरू एउटै पार्टीमा समावेश भई राष्ट्र निर्माणमा लाग्नुपर्नेमा जोड दिए। उनले देशमा अझै संकट नहटेको र जुनसुकै बेला अप्रत्याशित राजनीतिक घटना हुन सक्ने औंल्याउँदै जनविद्रोहका मागलाई सम्बोधन गर्ने गरी राजनीतिक दलहरूले जिम्मेवारीपूर्वक अघि बढ्नुपर्ने धारणा राखे।

कार्यक्रममा पाल्पाका १० वटै स्थानीय तहबाट आएका नेता तथा कार्यकर्ताहरू तानसेनको टुडिखेलबाट पञ्चेबाजा र नाराबाजीसहित जुलुस निकाल्दै नगरपरिक्रमा गरी अन्ततः एकता सन्देश सभामा सहभागी भएका थिए।