खोज

काठमाडौं, २० मंसिर ।

नेकपा एमालेका अध्यक्ष केपी शर्मा ओलीले आगामी निर्वाचनपछि फेरि पनि राजनीतिक दलहरूकै सरकार बन्ने बताएका छन् । अहिले कतिपयले फेरि पनि उही पुराना शक्ति नै सत्तामा आउने हो कि भनेर प्रश्न गरिरहेको उल्लेख गर्दै ओलीले यस्तो धारणा राखेका हुन् ।

पार्टी केन्द्रीय कार्यालय च्यासलमा आयोजित ‘नवयुग ई–बुलेटिन’ शुभारम्भ कार्यक्रममा बोल्दै उनले वर्तमान सरकार असंवैधानिक र हाहुको भरमा बनेको आरोप लगाए । उनले जेनजी सरकारका प्रधानमन्त्री आफूभन्दा तीन महिनामात्रै कान्छा भएको भन्दै व्यंग्यसमेत गरे ।

ओलीले भने, ‘अनि को फर्कने त ? अब सरकार कसको रे ? यसमा पनि दुविधा हुने ? आगो लगाएर सरकार बनाउने ? फेरि पनि यस्तै गरेर सरकार बनाउने ? अब फेरि हाहुकै भरमा सरकार बन्छ ? पार्टीको नबनेर ।’ उनले थप भने, ‘उही पुराना नेता आउँछन् रे ! केही थाहा नपाएका चाहिँ पुराना किन आएका त ? हामी चाहिँ बुढा हुने !

मभन्दा साढे तीन महिनामात्रै कान्छी चाहिँ “जित्नु न सित्नु, उसै प्रधानमन्त्री हुँ” भन्ने ?’ अध्यक्ष ओलीले आगामी निर्वाचनबाट आफ्नै पार्टी एमाले सरकारमा आउने दाबी गरे । अन्य दलहरूको अवस्थाबारे आफूलाई थाहा नभएको उल्लेख गर्दै उनले एमाले भने निश्चित रूपमा आउने बताएका छन् । साथै, आफ्नो दल शान्तिपूर्ण निर्वाचनको पर्खाइमा रहेको पनि उनले स्पष्ट पारे ।

उनका शब्दमा, ‘चुनाव जहिले होस्, हामी यो बीचमा सरकार बनाउने खेलमा छैनौँ । स्वतन्त्र, निष्पक्ष, धाँधलीरहित र शान्तिपूर्ण चुनावको पर्खाइमा छौँ । फागुन २१ को होइन । फागुन २१ मा चुनाव हुँदैन भन्ने हामीलाई थाहा छ । जहिले चुनाव हुन्छ, त्यसैबाट आउने अबको सरकारले एमाले नै नेतृत्व गर्छ ।’

ओलीले एमालेको उपस्थितिलाई ‘बाढीजस्तो’ भन्दै भने, ‘अरू आउँछन् कि आउँदैनन् थाहा छैन । एमाले चाहिँ आयो, आयो । एमाले त विशाला नदीमा आएको बाढीजस्तो हो ।’