खोज

पाल्पा, ११ मङ्सिर ।

तानसेनमा आगामी मङ्सिर १३ गते शनिबार योमरी महोत्सव आयोजना हुने भएको छ। तानसेनको ऐतिहासिक टक्सार टोलमा हुने महोत्सवको तयारी पूरा भएको आयोजक मैत्री क्लब तानसेनले पत्रकार सम्मेलनमार्फत जानकारी गराएको हो।

सन् २०३६ सालमा स्थापना भएको क्लबले सामाजिक गतिविधिमा निरन्तर सक्रिय रहँदै आएको छ । क्लबले हरेक वर्षझैँ यस वर्ष पनि टक्सार टोलमै योमरी महोत्सव आयोजना गर्न लागेको हो। महोत्सवमा २३ देखि २५ वटा स्टल रहनेछन्, जसमा विशेष गरी योमरी, नेवारी खाजा, नास्ता तथा विभिन्न परिकार राखिने जनाइएको छ।

महोत्सव दिउँसो १२:३० बजेदेखि साँझ ७:३० बजेसम्म सञ्चालन हुनेछ। क्लबले २०७६ सालदेखि नियमित रूपमा योमरी महोत्सव गर्दै आएको छ। महोत्सव सफल बनाउन तानसेन नगरपालिका–३ ले आर्थिक सहयोग प्रदान गरेको क्लबले जनाएको छ।

नेपाल पत्रकार महासंघ पाल्पाका अध्यक्ष कमलराज तिमिल्सिनाले मैत्री क्लबले समुदायमा प्रशंसनीय काम गर्दै आएको उल्लेख गर्दै महोत्सवले टक्सार टोलको चहलपहल बढाउने विश्वास व्यक्त गरे। “यो क्षेत्र करुवा उद्योगको ऐतिहासिक स्थान भएकाले महोत्सवले यहाँको सांस्कृतिक र आर्थिक गतिविधि विस्तारमा मद्दत गर्नेछ,” अध्यक्ष तिमिल्सिनाले भने। उनले टक्सार टोलका दिदीबहिनीहरू श्रमशील भएको बताउँदै पत्रकारिताको तर्फबाट आवश्यक सहयोग गर्ने आश्वासन दिए।

कार्यक्रममा सहभागी पत्रकारहरूले तानसेनका होटल तथा रेस्टुरेन्टहरूमा ‘योमरी’लाई नियमित मेनुमा समावेश गर्न व्यवसायीहरूसँग पहल गर्नुपर्ने सुझाव राखे। पत्रकार कृष्ण पोखरेल, नारायण न्यौपाने र किरण कौशलले महोत्सवको दीर्घकालीन प्रभावबारे जिज्ञासा समेत राखेका थिए।