खोज

काठमान्डौ, २ मंसिर ।

युरोपेली विमान निर्माता एयरबसले आगामी दुई दशकमा विश्वभर ४२ हजार ५२० नयाँ विमान आवश्यक पर्ने अनुमान गरेको छ ।

एयरबसका अनुसार एसिया–प्रशान्त क्षेत्रमा मात्र करिब १९ हजार ५६० नयाँ विमानको आवश्यकता पर्ला, जुन विश्व कुल मागको झन्डै ४६ प्रतिशत हो । भारत र चीनको विशाल जनसंख्या तथा तीव्र रूपमा बढिरहेको हवाइ यात्रुको मागले विमान आवश्यकताको दर उच्च बनेको अन्तर्राष्ट्रिय उड्डयन सञ्चारमाध्यम सिम्पल फ्लाइङले उल्लेख गरेको छ ।

सिम्पल फ्लाइङका अनुसार भारतीय बजेट एयरलाइन्स ‘इन्डिगो’ ले मात्र हालसम्म करिब १ हजार नयाँ एयरबस विमानको अर्डर गरिसकेको छ ।

कोभिड–१९ पछि विश्वभर हवाइ यात्रु संख्या तीव्र रूपमा बढेको छ । यात्रु वृद्धिसँगै वायुसेवा कम्पनीहरूले नयाँ र प्रविधि–मैत्री विमान थप्ने तथा पुराना विमान क्रमशः प्रतिस्थापन गर्ने प्रक्रियालाई तिव्र पारेका छन् । नयाँ पुस्ताका विमान इन्धन–सक्षम, पर्यावरण–मैत्री र यात्रुहरूको सुविधा अनुकूल हुने भएकाले माग बढ्दो छ ।

एसिया–प्रशान्त एयरलाइन्स सङ्घको हालै बैंककमा सम्पन्न बैठकमा आगामी २० वर्षमा क्षेत्रकै लागि ३ हजार ५०० वाइडबडी र १६ हजार न्यारोबडी विमान आवश्यक पर्ने अनुमान प्रस्तुत गरिएको सिम्पल फ्लाइङले जनाएको छ ।

फ्लाइङका अनुसार यो संख्या विश्वभर आगामी दुई दशकमा डेलिभरी हुने कुल विमानको ४७ प्रतिशतभन्दा बढी हो । कुल मागमध्ये ६८ प्रतिशत विमान यात्रु वृद्धि तथा रूट विस्तारका लागि प्रयोग हुनेछन् भने ३२ प्रतिशत पुराना विमान प्रतिस्थापनका लागि रहनेछ ।

लो–कस्ट क्यारियर (सस्तो भाडाका एयरलाइन्स)  को तीव्र विस्तार, क्षेत्रीय अर्थतन्त्रको विकास र हवाइ यात्रुको निरन्तर बढ्दो माग यस क्षेत्रका विमान खरिद वृद्धिका मुख्य कारक मानिएका छन् । एयर एसिया, इन्डिगो, सेबु प्याफिकजस्ता ठूला एयरलाइन्सले लगातार नयाँ विमान थपिरहेका छन् ।

भारतमा हवाइ यात्रा झन् सस्तो र सहज बन्दै गएसँगै उड्डयन सेवाको पहुँच दुर्गम क्षेत्रसम्म फैलिएको छ, जसले व्यापार, पर्यटन र समग्र यातायात प्रणालीलाई अझ सुलभ बनाउन सहयोग पुर्‍याएको छ ।