खोज

बुटवल, ७ पुस ।

राष्ट्रपति विद्यादेवी भण्डारीले मुलुकको अर्थतन्त्रले गम्भीर चुनौतीको सामना गरिरहेको बताएकी छन् ।

रुपन्देही उद्योग संघ, लुम्बिनी उद्योग परिसंघ र नेपाल उद्योग परिसंघको संयुक्त आयोजनामा बिहीबारदेखि बुटवलमा सुरु भएको राष्ट्रिय औद्योगिक प्रदर्शनी, कृषि प्रविधि एवं पर्यटन महोत्सवको उदघाटन गर्दै राष्ट्रपति भण्डारीले यस्तो बताएकी हुन् ।

उनले व्यापार घाटा बढिरहेको, आयात नियन्त्रण नभै झनै बिस्तार भएको र मुद्रा सन्चितीमा अभूतपुर्व चाप परेको भन्दै अर्थतन्त्र गम्भीर चुनौतीको अवस्थामा रहेको बताइन् । मुलुकको अर्थतन्त्रलाई लयमा फर्काउन आयात प्रतिष्थापन गर्ने खालका वन पैदावार र जडिबुटीजन्य उद्योग स्थापनामा जोड दिनुपर्ने र निर्यात बढाउनुपर्ने उनको भनाई छ । “अव जडिबुटीजन्य एवं वन पैदावारमा आधारित उद्योग स्थापनातर्फ केन्द्रित हुन र निर्यात बढाउने दिशामा लाग्न म सम्बन्धित निकायलाई ध्यानाकर्षण गराउन चाहन्छु”–उनले भनिन् ।

राष्ट्रपति भण्डारीले खेतीयोग्य जमिन बाँझो नराख्नका लागि युवा जनशक्तिलाई कृषि क्षेत्रमा लगाउनुपर्ने र कृषिजन्य उत्पादनलाई बढाउन सके व्यापार घाटा कम गर्न सकिने बताइन् । राष्ट्रपति भण्डारीले भैरहवामा निर्माण सम्पन्न भएको गौतमबुद्ध अन्तर्राष्ट्रिय विमानस्थललाई व्यवस्थित रुपमा सञ्चालन गर्न सरकारको ध्यानाकर्षण गराइन् । “विमानस्थललाई व्यवस्थित रुपले सञ्चालन गर्न सके यस क्षेत्रको औद्योगिक विकास सँगै पर्यटन क्षेत्रको विकासले पनि गति लिन्छ, यसका लागि सम्बन्धित निकायले तदारुकता देखाउन जरुरी छ”–उनले भनिन् ।

राष्ट्रपति भण्डारीले राज्यको ढुकुटीमा आफ्नो परिश्रमबाट कर तिर्ने उद्यमी र किसानले सेवा प्राप्त गरुन् भन्नेतर्फ ध्यान दिन सम्बन्धित निकायको ध्यानाकर्षण समेत गराइन् । उनले बुटवलमा आयोजित राष्ट्रिय औद्योगिक प्रदर्शनीले मुलुकको समृद्धि र जनताको सुखको अपेक्षालाई प्रतिनिधित्व गर्ने समेत बताइन् । “यसले उद्योगको प्रवद्र्धन, उद्योगीलाई उत्साह र उपभोक्तालाई चेतना जगाउँछ, स्वदेशी उत्पादनको प्रवद्र्धन र बजारीकरणमा समेत सहयोग पुग्छ”–उनले भनिन् । उनले यस्ता प्रदर्शनीहरुले उद्योगी, उपभोक्ता र सरकारी निकायबीच अन्तक्र्रियाको अवसर प्रदान गर्ने भन्दै आयोजकलाई धन्यवाद दिइन् ।

त्यस अवसरमा बोल्दै लुम्बिनी प्रदेश उद्योग परिसंघका अध्यक्ष एजाज आलमले मुलुकको आर्थिक क्षेत्र संकटमा पर्दै गएको, उद्योगधन्दाहरु बन्द हुने अवस्थामा पुगेको र बैंकको चर्को ब्याजदरका कारण अर्को संकट थपिएको भन्दै यसको समाधानका लागि सरकारको ध्यानाकर्षण गराए ।

उनले लामो समयपछि बुटवलले स्थायी प्रदर्शनीस्थल पाएको भन्दै यसको निर्माणका लागि ठूलो बजेटको व्यवस्था गरेकोमा पुर्व अर्थमन्त्री एवं रुपन्देही क्षेत्र नम्बर २ का सांसद विष्णु पौडेललाई धन्यवाद समेत दिए ।

बुटवल उपमहानगरपालिकाका प्रमुख खेलराज पाण्डेले स्थायी प्रदर्शनी स्थल बनेसँगै उदोगी व्यवसायीको लामो समयदेखिको माग पूरा भएको भन्दै यसका लागि पहल गर्ने सबैप्रति आभार व्यक्त गरे ।

रुपन्देही उद्योग संघका अध्यक्ष माधवप्रसाद पौडेलले संघले राजधानीबाहिर पहिलोपटक २०४५ सालमा प्रदर्शनीको सुरुवात गरेको स्मरण गर्दै अहिले यो देशव्यापी बिस्तार भएकोमा संघ गौरवान्वित भएको बताए ।

उनले मुलुकको औद्योगिक क्षेत्र निकै नै संकटमा पुगेको, भएका उद्योगधन्दाहरु बन्द हुने अवस्थामा पुगेको, बैंकको चर्को ब्याजदरका कारण लगानी गर्ने वातावरण पनि नभएको भन्दै उद्योगमैत्री बन्न सरकार, बैंक वित्तीय संस्था एवं सरोकारवाला सबैको ध्यानाकर्षण गराए ।

कोभिडका कारण संकटमा परेका उद्योगी व्यवसायीमाथि बैंकको चर्को ब्याजदर अर्को मुख्य समस्याको रुपमा देखिएको उनको भनाई छ । कार्यक्रममा संघका प्रथम उपाध्यक्ष दिलिप सापकोटा, महासचिव हरिप्रसाद श्रेष्ठलगायतले पनि मन्तव्य व्यक्त गरेका थिए ।