खोज

चन्द्रौटा(कपिलवस्तु), ६ पुस ।

कपिलवस्तु सातौँ चन्द्रौटा कृषि, पर्यटन तथा औद्योगिक व्यापार महोत्सवको तयारी पूरा भएको छ । चन्द्रौटामा पुस ७ गतेबाट हुन लागेको महोत्सवको तयारी पूरा भएको बुधबार पत्रकार सम्मेलन गरी आयोजकले जनाएको छ ।

आर्थिक गतिविधि चलायमान बनाउने तथा पर्यटन प्रवद्र्धन गर्ने उद्देश्यले महोत्सवको आयोजना गरिएको आयोजक समिति संयोजक महादेव पोख्रेलले बताए । महोत्सवले कोभिड १९ को कारण शिथिल बनेको अर्थतन्त्र चलायमान बनाउन र यस क्षेत्रका धार्मिक तथा पर्यटकीय स्थलको प्रचारप्रसार गर्न टेवा पुग्ने उनले बताए । स्थानीय उत्पादनले स्थान पाउने लगायत स्थानीय व्यवसायीलाई प्राथमिकता दिइएको संयोजक पोख्रेलको भनाइ छ ।

महोत्सवमा कृषिजन्य उत्पादनका स्टलहरु निः शुल्क राख्ने व्यवस्था मिलाइएको संयोजक पोख्रेलको भनाइ छ । “कृषि पर्यटन, उद्योग र ब्यापार ब्यावसायिक दिगोपना हाम्रो मुख्य आधार” भन्ने मूल नाराका साथ चन्द्रौटामा सञ्चालन हुने महोत्सवमा स्थानीय स्तरमा उत्पादित कृषिजन्य वस्तु तथा जातजातिको संरक्षण र पहिचान झल्काउने वस्तुहरुका लागि निःशुल्क रुपमा स्टल उपलब्ध गराइएको आयोजकले जनाएको छ । व्यापार संघ कपिलवस्तुको आयोजनामा यही पुस ७ गते बाट सञ्चालन हुने महोत्सव २१ गतेसम्म चल्ने संघले जनाएको छ ।

एक सय ५० बढी स्टल रहने महोत्सवमा कृषि, पर्यटन, व्यापार, उद्योग, कला–संस्कृति, शैक्षिक प्रदर्शनी लगायतका स्टलहरु रहने छन् । पत्रकार महासंघ लुम्बिनी प्रदेश सदस्य चिन्ता परियार, जिल्ला अध्यक्ष किरणमान बज्राचार्य, अकोराब लुम्बिनी प्रदेश अध्यक्ष राजु खराल लगायतले कार्यक्रमलाई सम्बोधन गरेका थिए ।