खोज

बुटवल, ५ कार्तिक ।

नेपाल सम्वत ११४६ को अवसरमा बुटवलमा छरिएर रहेका नेवार समुदायले सचेतनामूलक र्याली, झाकी प्रदर्शन तथा शुभकामना आदानप्रदान कार्यक्रम गरि मनाएको छ ।

बुटवल उपमहानगरपालिकाको आयोजना, भिंद्यो नेवाः समाजको संयोजनमा गरिएको कार्यक्रममा नेवाः देय दबू, बुटवल नगर समिति, नेवाः मिसा दबू, बुटवल नगर समिति, श्री नेवाः सेवा समिति, नेवाः समाज अर्घाखाँची रुपन्देही, नेवाः सांस्कृतिक संरक्षण समाज, देबीनगर भिमसेन नेवाः समाज बुटवल, श्री गणेश नेवाः समाज, केरुङ्गेली नेवा समाज, तानसेन गुठी बुटवल सहभागी रहेको रयाली नेवा सेवा समितिको सचिवालयबाट शुभारम्भ भई नगर परिक्रमा गरि बुटवल उपमहानगरपालिकामा पुगेर औपचारिक कार्यक्रम गरिएको थियो ।

कार्यक्रममा सहभागीहरूले नयाँ वर्ष, नयाँ सोच — भिन्तुनामा एकताको सन्देश, नेपाल सम्बत ११४६ — नेवार संस्कृतिको नवप्रभात, भिन्तुना मनाऔँ, संस्कृति बचाऔँ, संस्कृति हाम्रो सम्पदा — भिन्तुना हाम्रो उत्सव, नेवा देय् दबुको भिन्तुना, नेवाः एकता, संस्कृति र भाषाको जर्गेना गरौ नारासहित प्लेकार्डसहित पैदल यात्रामा सहभागी भएका थिए । नेवार संस्कृति झल्किने लाखे नाच, घोडेनाचका साथै धिमेबाजा बजाउँदै सहभागी युवाहरूले आफ्नो कला प्रदर्शन समेत गरेका थिए ।

कार्यक्रमको औपचारिक रूपमा केन्द्रीय पार्षद् तथा नेवा सेवा समितिका निवर्तमान अध्यक्ष चिरञ्जीवी श्रेष्ठ, नेवा देय दबुका नगर अध्यक्ष सुन्दर श्रेष्ठ, मिसा देबुकी अध्यक्ष सिता जोशी, नेवा सेवा समितिका अध्यक्ष डिल्ली कुमार श्रेष्ठ, अर्घाखाँची नेवा समितिका अध्यक्ष देवि कुमार श्रेष्ठ, पाल्पाली नेवाका हिरा कुमार श्रेष्ठले शंखध्वर साख्यको तस्बिरमा माल्यार्पण र बाजागाजाको पूजा गरि उद्घाटन गरेका थिए ।

कार्यक्रममा भिन्दो नेपालका अध्यक्ष पारु श्रेष्ठले यो वर्ष विभिन्न पुच, समाज, गुठीमा आबद्ध नेवारहरूलाई एकैठाउ समेटेर सामूहिक रूपमा भव्य कार्यक्रम गरिएको बत्ताइन । नेवारी संस्कृति जर्गेनाका लागि भाषा कक्षा, बाजा बजाउने तालिम तथा सांस्कृतिक कार्यक्रमहरू गर्दै आएको उनले बत्ताइन ।

यसैबिच समापन कार्यक्रममा बुटवल उपमहानगरपालिकाका नगरप्रमुख खेलराज पाण्डेले सबै भाषा, धर्म र संस्कृतिलाई प्राथमिकतामा राखेर स्थानीय सरकार निरन्तर काम गरिरहेको बताए । जातीय भाषाको बडापत्रको पहिचान झल्किने वडापत्र तयार गरेर नमुना काम यहाँ गरेको उनले बताए ।

संविधानले सबै जाती भाषा र संरक्षण गर्ने कुरामा स्थानीय सरकारलाई दिएको अधिकार क्षेत्रमा काम गरिरहेको उनले दाबी गरे ।