खोज

 दाङ,३० असोज ।

जनस्वास्थ्य कार्यालय दाङको आयोजना आर्थिक वर्ष २०८१/०८२ मा सम्पादित स्वास्थ्य कार्यक्रमको जिल्ला स्तरीय समीक्षा कार्यक्रम घोराहीमा सुरु भएको छ ।

जिल्ला समन्वय समिति दाङका प्रमुख नित्यानन्द शर्माले स्वास्थ्य क्षेत्रमा देखिएका समस्याहरूको समाधान गर्दै नागरिक मैत्री सेवामा ध्यान दिनुपर्नेमा जोड दिएका छन् । कार्यक्रममा बाल मृत्यु तथा मातृ मृत्यु, कुपोषण लगायतका कतिपय सूचकहरूमा अहिले पनि सुधार आउन नसकेकोमा चिन्ता व्यक्त गर्दै सुधारका लागि सबैले हातेमालो गरेर अगाडि बढ्नुपर्ने बताए ।

घोराही उपमहानगरपालिका उपप्रमुख हुमा डिसीले स्वास्थ्यमा सबैको पहुँच पुग्नुपर्छ भन्ने मान्यताका साथ राप्ती स्वास्थ्य प्रतिष्ठानसँग सहकार्य गरेर  हप्तामा एक दिन महिलाको पाठेघरको परीक्षण गर्ने गरिएको बताइन् । रोग लाग्नुभन्दा पहिले नै सचेत हुनुपर्ने उनको धारणा थियो ।

राप्ती स्वास्थ्य विज्ञान प्रतिष्ठानका निमित्त निर्देशक डाक्टर जनार्दन पन्थीले स्वास्थ्य जस्तो कुरामा खेलबाड नगरी नागरिकका घर घरमा सेवा दिनुपर्ने बताए ।

कार्यक्रममा प्रमुख जिल्ला अधिकारी विश्व प्रकाश अर्याल,लुम्बिनी स्वास्थ्य मन्त्रालयका नर्सिङ महाशाखा प्रमुख इश्वरी केसी , लुम्बिनी स्वास्थ्य निर्देशनालयका अच्युत न्याैपाने, फेरमेड संस्थाका राजेन्द्र रुचाल, पत्रकार महासंघ दाङका अध्यक्ष सन्तोष  सुबेदी लगायतले  स्वास्थ्य जस्तो संबेदनसिल कुरामा सबै गम्भीर बन्नुपर्ने बताए ।

दुई दिन सम्म सञ्चालन हुने समीक्षा कार्यक्रममा जिल्लाकाे समग्रमा स्वास्थ्य अवस्थाका बारेमा जनस्वास्थ्य कार्यालयका गजेन्द्र यादवले जानकारी दिए । जिल्लाका दश पालिकाले वर्ष भरी गरेका कामको प्रगति विवरण र आगामी कार्यक्रमका बारेमा प्रस्तुतीकरण गर्ने छन् ।