खोज

काठमान्डौ, ३० असोज ।

डेढ साताभित्रै सुनको मूल्य तोलामा २७ हजार सात सय रुपैयाँले वृद्धि भई इतिहासकै नयाँ उचाइमा पुगेको छ ।

नेपाल सुनचाँदी व्यवसायी महासंघका अनुसार आज (बिहीबार) सुनको मूल्य तोलामा दुई लाख ५० हजार नौ सय रुपैयाँ कायम गरिएको छ, जो हालसम्मकै उच्च दर हो ।

व्यवसायीहरूका अनुसार अन्तर्राष्ट्रिय बजारमा लगातार भइरहेको मूल्यवृद्धिको प्रत्यक्ष प्रभाव नेपाली बजारमा परिरहेको हो ।

गत असोज १९ गतेदेखि आजसम्म १२ दिनको अवधिमा सुनको मूल्यमा उल्लेख्य वृद्धि भएको छ । सो दिन तोलामा सात हजार चार सय रुपैयाँले बढेको मूल्य त्यसयता निरन्तर बढ्दो क्रममा छ ।

दसैँअघि असोज १२ गते सुनको मूल्य तोलामा दुई लाख २३ हजार दुई सय रुपैयाँ थियो । दसैँ अवधिभर नयाँ मूल्य निर्धारण नभए पनि दसैँ सकिएलगत्तै असोज १९ गतेदेखि सुनको भाउ तीव्र रूपमा बढ्न थालेको हो । त्यसपछि प्रायः हरेक दिन सुनचाँदीको मूल्य उकालो लागिरहेको व्यवसायी महासंघले जनाएको छ ।

गएको मंगलबार मात्र सुनको मूल्य तोलामा आठ हजार एक सय रुपैयाँले बढेको थियो । आज फेरि तोलामा दुई हजार रुपैयाँले बढ्दै मूल्य दुई लाख ५० हजार नौ सय रुपैयाँमा पुगेको छ ।

यसअघि मंसिर १० गते सरकारले भन्सारदर घटाएपछि सुनको मूल्य एकैदिनमा तोलामा १५ हजार नौ सय रुपैयाँले घटेको थियो । तर हाल अन्तर्राष्ट्रिय बजारमा पुनः बढ्दो दरका कारण नेपाली बजारमा सुनको मूल्य फेरि ऐतिहासिक उचाइमा पुगेको हो ।