खोज

काठमान्डौ, २९ असोज ।

गृहमन्त्री ओमप्रकाश अर्यालले वर्तमान सरकार जनक्रान्तिपछि बनेको सरकार भएको उल्लेख गर्दै यसलाई असंवैधानिक भन्ने अधिकार कसैलाई नभएको स्पष्ट पारेका छन् ।

गृह मन्त्रालय परिसरमा पत्रकारहरूसँग कुरा गर्दै मन्त्री अर्यालले भने, “सरकारलाई असंवैधानिक भन्नेहरू नै अहिले टुक्रिन थालेका छन् । क्रान्तिकारीहरूलाई उनीहरू आतंककारी देखिरहेका छन् । यो क्रान्तिपछि बनेको सरकार हो, हेक्का रहोस् ।”

सुशासनका सवालमा मन्त्री अर्यालले सरकार प्रतिबद्ध रहेको जनाउँदै भने, “सुशासनका लागि हामीले विद्रोह गरेको हो, त्यसपछि सुशासन छोड्छौं ररु”

उनले अघिल्ला सरकारहरूले सुरक्षाकर्मीहरूको दुरुपयोग गरेको आरोप लगाउँदै भने, “बर्दीधारीलाई लगेर घरमा भान्से बनाउनुभयो, ड्राइभर बनाउनुभयो, सुरक्षाकर्मीको मापदण्डविपरीत प्रयोग गर्नुभयो । अहिले तिनीहरुले नै सरकारको काममा विरोध गरिरहेका छन् ।”

अर्यालले हाल सरकारले अनावश्यक सुरक्षा फिर्ता गर्दा केही समूहले असन्तोष देखाएको बताउँदै भने, “सुरक्षा व्यवस्थामा सुधार ल्याउने प्रयास भइरहेको छ । तर कतिपयले त्यसलाई बहाना बनाएर ‘शान्ति सुरक्षा छैन’ भन्न थालेका छन्, जुन भ्रमपूर्ण हो ।”

उनले व्यक्तिगत सुरक्षाको विषयमा औपचारिक निवेदन दिन आग्रह गर्दै भने, “यदि कसैलाई वास्तविक थ्रेट छ भने निवेदन दिनुहोस्, हामी त्यसको मूल्यांकन गरेर तुरुन्त कारबाही गर्छौं ।”

गृहमन्त्री अर्यालले अन्त्यमा जोड दिए, “सरकार शान्ति, सुरक्षा र सुशासनका सवालमा गम्भीर छ, जुन व्यवहारले प्रमाणित हुनेछ ।”