खोज

काठमाडौं ।

जेन–जी आन्दोलनका क्रममा टीओबी (तिब्बतियन ओरिजनल ब्लड) लेखिएको टिसर्ट लगाएका एक युवकले पेस्तोल बोकेको तस्बिर सार्वजनिक भएपछि प्रहरी सतर्क बनेको छ। उक्त तस्बिर सामाजिक सञ्जालमा भाइरल भएपछि प्रहरीले ती युवकको खोजी सुरु गरेको जनाएको छ।

केही दिनयता सामाजिक सञ्जालमा टीओबी लेखिएको टिसर्ट लगाएका शंकास्पद व्यक्तिहरू आन्दोलनमा घुसपैठ गरेको चर्चा हुँदै आएको थियो। यस्ता व्यक्तिहरूले आन्दोलनको भीडलाई उक्साउने प्रयास गरेको देखिने थुप्रै तस्बिर र भिडियोहरू पनि सार्वजनिक भएका छन्। तीमध्ये एक युवाले पेस्तोल बोकेको देखिने तस्बिर बाहिरिएपछि प्रहरीले यसलाई गम्भीर रूपमा लिएको हो।

काठमाडौं प्रहरी परिसरका प्रवक्ता एसपी पवन भट्टराईका अनुसार सो तस्बिर र यससँग सम्बन्धित भिडियो फुटेजहरू संकलन गरी अनुसन्धान अघि बढाइएको छ। “उक्त युवकको पहिचान गर्ने कार्य भइरहेको छ। प्रमाण संकलन भइसकेपछि आवश्यक कानुनी कारबाहीका लागि पक्राउ गरिनेछ,” भट्टराईले भने।

सामाजिक सञ्जालमा भाइरल तस्बिरमा बिजुलीबजार पुल नजिकको स्थान जस्तो देखिन्छ। त्यसमा टीओबी लेखिएको सेतो टिसर्ट लगाएका एक युवकले आफ्नो पाइन्टको पछाडितर्फ पेस्तोल घुसाइरहेको देखिन्छ भने छेउमा उभिएको अर्को युवकले नियालिरहेको दृश्य देखिन्छ।

प्रहरीको प्रारम्भिक मूल्यांकन अनुसार उक्त तस्बिर सक्कली हो र यसमा देखिएका व्यक्तिहरूको पहिचान गर्न विशेष टोली खटाइएको छ। प्रहरीका अनुसार यस घटनाले जेन–जी आन्दोलनमा बाहिरी समूहहरूको संलग्नताबारे पनि थप प्रश्नहरू उठाएको छ।