© २०२३
१९ मंसिर २०८२, शुक्रबार
१९ मंसिर २०८२, शुक्रबार
काठमान्डौ, २३ असोज ।
भारतमा ‘कोल्ड्रिफ कफ सिरप’ सेवनबाट कम्तीमा २० बालबालिकाको मृत्यु भएपछि यस औषधि उत्पादन गर्ने कम्पनीका मालिक एस. रंगनाथनलाई प्रहरीले पक्राउ गरेको छ ।
भारतीय सञ्चारमाध्यमहरूका अनुसार मध्य प्रदेश प्रहरीले उनलाई गएराति चेन्नईबाट नियन्त्रणमा लिएको हो । रंगनाथनको औषधि कम्पनी स्रिसन फार्मा तमिलनाडुस्थित कान्चीपुरमा रहेको बताइएको छ ।
छिन्दवाडाका प्रहरी अधीक्षक अजय पाण्डेले एएनआईलाई बताए अनुसार रंगनाथनलाई प्रारम्भिक रूपमा चेन्नईको अदालतमा पेश गरिनेछ । अदालतबाट ट्रान्जिट रिमान्ड प्राप्त गरेपछि उनलाई मध्य प्रदेशको छिन्दवाडा ल्याइनेछ ।
‘कोल्ड्रिफ कफ सिरप’ सेवनपछि मध्य प्रदेशका विभिन्न क्षेत्रका बालबालिकामा विषाक्तता देखिँदा कम्तीमा २० जनाको ज्यान गएको घटनाले भारतभर ठूलो हंगामा मच्चिएको छ । प्रारम्भिक अनुसन्धानका अनुसार औषधिमा अत्यधिक मात्रा रासायनिक तत्व रहेको शंका गरिएको छ ।
यसैबीच, नेपाल औषधि व्यवस्था विभागले ‘कोल्ड्रिफ कफ सिरप’ नेपालमा दर्ता नभएको स्पष्ट पारेको छ । विभागका अनुसार उक्त औषधि नेपालको बजारमा आधिकारिक रूपमा उपलब्ध छैन ।
© २०२३
सर्वाधिकार सुरक्षित
Design & Developed By:
