खोज

काठमान्डौ, २३ असोज ।

इजरायल र हमासबीच युद्धविराम सम्झौता भएपछि बन्धक बनाइएका नेपाली विद्यार्थी विपिन जोशीको अवस्थाबारे स्पष्ट जानकारी आउने आशा पलाएको छ । तर हालसम्म उनको जीवन वा अवस्थासम्बन्धी ठोस तथ्य सार्वजनिक भएको छैन ।

नेपालका लागि इजरायलका राजदूत धनप्रसाद पण्डितले इजरायली अधिकारीहरूसँग निरन्तर सम्पर्कमा रही विपिनको अवस्थाबारे जानकारी लिने प्रयास भइरहेको बताए । तर अहिलेसम्म कुनै प्रत्यक्ष विवरण प्राप्त नभएको उनले स्पष्ट पारे ।

यसैबीच, परराष्ट्र मन्त्रालयका अधिकारीहरूले पनि विपिनको अवस्थाबारे बुझ्ने प्रयास जारी रहेको जनाएका छन् । मन्त्रालयका एक कर्मचारीका अनुसार, इजरायल सरकारको तर्फबाट विपिनको जुनसुकै अवस्थाको जानकारी आउन सक्छ, त्यसका लागि परिवारलाई तयार रहन भनिएको छ ।

कञ्चनपुरका विपिन जोशी अध्ययनका लागि इजरायल पुगेका थिए । सन् २०२३ अक्टोबर ७ मा हमासले किबुत्ज क्षेत्रमा गरेको आक्रमणका क्रममा उनी बन्धक बनाइएका थिए । उक्त आक्रमणमा १० जना नेपाली विद्यार्थीको मृत्यु भएको थियो ।

हमासका लडाकूहरूले विपिनलाई साथमै लगेको पुष्टि भए पनि त्यसयता उनको अवस्थाबारे कुनै विश्वसनीय जानकारी प्राप्त भएको छैन । सन् २०२३ नोभेम्बर १७ मा उनी गाजाको अल शिफा अस्पतालमा देखिएको बताइएको थियो । तर त्यसपछि उनको अवस्थाबारे कुनै नयाँ सूचना आएको छैन ।

हालै सार्वजनिक गरिएको ३३ सेकेन्डको भिडियोमा विपिनले आफू नेपाली नागरिक भएको र “अर्न एन्ड लर्न” कार्यक्रमअन्तर्गत इजरायल आएको बताएका छन् । गाढा नीलो कपडा लगाएका उनले भिडियोमा शान्त मुद्रामा कुरा गरेका छन्, तर त्यो भिडियो कहिले र कहाँ खिचिएको हो भन्ने स्पष्ट छैन ।

राजदूत पण्डितका अनुसार, उक्त भिडियो नयाँ नभई पुरानो फुटेज हो, सम्भवतः बन्धक बनाइएकै समयको हो ।

विपिनको अवस्थाबारे अनिश्चितता अझै कायम रहे पनि युद्धविरामपछि आशाको किरण देखिएको राजनयिक स्रोतहरूको भनाइ छ । नेपाल सरकारले पनि उनको उद्धार र अवस्थाबारे निरन्तर पहल जारी राखेको जनाएको छ ।