खोज

बुटवल, २९ मंसिर ।

नेकपा एमालेका पोलिटब्यूरो सदस्य सूर्य थापाले काँग्रेस–एमाले मिलेर देशलाई स्थिरता दिनुपर्ने बताएका छन् ।

अहिलेको चुनावी परिणामले मुलुकमा अस्थिरता निम्तिने खतरा औंल्याउँदै थापाले स्थिरताका लागि काँग्रेस–एमाले मिलेर सरकार बनाउनुपर्ने उनले बताए । चुनाव जितेपछि प्यूठानका मतदातासँग भेटघाट गरी काठमाडौं फर्किने क्रममा बुटवल आइपुगेका थापाले बिहीबार पत्रकारहरुसँगको भेटघाट कार्यक्रममा यस्तो बताएका हुन् ।

अव बाम गठबन्धनको नाममा एमाले सिद्धान्तहीन दलहरुसँग एमालेले सहकार्य नगर्ने प्रष्ट्याए । “२०७४ सालमा बाम गठबन्धन नीति र सिद्धान्तमा आधारित रहेर गरिएको थियो, तर त्यसलाई माओवादीले उपयोग गरी पार्टी कब्जाको रणनीति बनायो, अव कब्जाको उद्देश्य राख्नेहरुसँग एकता वा सहकार्य हुने संभावना देखिन्न”–थापाले भने ।

पार्टी अध्यक्ष केपी ओलीलाई चार चार पल्ट निष्काशित गर्नेहरुसँग फेरि एकताको कल्पना नगरिएको उनको भनाई छ । मुलुकमा मुख्य दुई शक्ति काँग्रेस र एमाले मात्र रहेको दावी गर्दै एमाले नेता थापाले अरुको झोला बोकेर हिंडनेहरुसँग सहकार्यको औचित्य नहुने बताए । “एकमात्र बामशक्ति एमाले हो, अर्को शक्ति काँग्रेस हो, अरु दलहरु काँग्रेस वा एमालेको बैशाखी टेकेर मात्र राजनीति गरिरहेका छन्”–थापाले भने–“दुई मुख्य शक्ति मिलेर सरकार बनाउने हो भने काँग्रेस–एमाले दुवैको परीक्षण पनि हुन्छ र देशले स्थिरता पनि पाउँछ ।”

उनले माओवादी केन्द्रका अध्यक्ष पुष्पकमल दाहाल प्रचण्डलाई प्रधानमन्त्री बनाउने गल्ती एमालेले नगर्ने बताए । यदि पार्टी त्यो दिशामा गयो भने सबैभन्दा पहिले आफूले नोट अफ डिसेन्ट लेख्ने पनि थापाको भनाई छ । “प्रचण्डलाई प्रधानमन्त्री बनाउने कुराको कल्पना गर्न सकिंदैन, यदि पार्टीले उनको नेतृत्व मानेर सरकार गठन गरेमा मैले सबभन्दा पहिले नोट अफ डिसेन्ट लेख्छु”–उनले भने ।

थापाले मुलुकको विद्यमान निर्वाचन प्रणालीबारे बहस चलाउनुपर्ने आवश्यकता औंल्याए । संविधान जारी गर्ने बेलामा अहिलेको निर्वाचन प्रणालीको चर्को वकालत गर्नेहरु कसको इशारामा चलेका थिए भन्ने कुराको पुष्टि क्रमशः हुँदै गएको भन्दै थापाले नेपालमा अस्थिरता निम्त्याउन स्वार्थको रोटी सेक्ने तत्वहरु अहिलेसम्म सफल भएको बताए ।

उनले चुनाव जितेपछि प्यूठानका ६४ वटा वडाका २०० वटा टोल विकास संस्थाहरुमा पुगेर मतदातालाई धन्यवाद दिएर आएको र उनीहरुको विकासप्रतिको आकांक्षा र पिरमर्कालाई नजीकबाट नियालेको बताए । “सडक, पूर्वाधार, पुल, शिक्षा, स्वास्थ्य, रोजगारी जस्ता कुरामा अव मेरो ध्यान हुनेछ”–थापाले भने ।

उनले आफूलाई विकासको सिस्टम बसाउन चाहेको भन्दै यसका लागि अधिकतम प्रयास गर्ने पनि बताए । प्यूठानमा स्वर्गद्वारी विमानस्थल निर्माण गरिने उल्लेख गर्दै थापाले यसको प्रक्रिया पनि अगाडि बढेको जानकारी दिए । प्यूठानमा विमानस्थल चल्दैन भन्नेहरुलाई जवाफ दिंदै थापाले भने–“सोलुखुम्बुमा ७ वटा विमानस्थल सञ्चालनमा छन्, प्यूठानमा नचल्ने प्रश्नै आउँदैन, पर्यटकीय केन्द्रको रुपमा विकास गर्ने हो भने हवाई मार्ग हुँदै स्वर्गद्वारीमा लाखौं पर्यटक भित्र्याउन सकिन्छ ।”