खोज

बुटवल, १७ असोज ।
लायन्स ईन्टरनेश्नल डिष्ट्रिक ३२५ पि नेपालको आयोजनामा विश्व मानसिक स्वस्थ्य दिवसको अवसरमा शनिबारदेखि सप्ताहब्यापी सचेतनामुलक कार्यक्रम गर्ने भएको छ । शुक्रबार बुटवलमा पत्रकार सम्मेलनमा डिष्ट्रिक गभर्नर बालाराम भटटराईले यो वर्ष “सानो कदम, ठूलो प्रभावः निरन्तर संवाद गरौं–सचेतना फैलाऔं” नारासहित लायन्सबाट विविध कार्यक्रम गर्न लागेको हो । जागरण बढाउने, शिक्षा प्रदान गर्ने र लक्षित वर्गका सेवाग्राहीहरुलाई सेवा दिने मुख्य ३ वटा कामलाई प्राथमिकतामा राखेको उनले बताए । ‘शनिबार बिहान जुम मिटिङमार्फत कार्यक्रमको औपचारिक उद्घाटन गरिने छ ।’– उनले भने ।

लगत्तै महिला, गृहिणी, टोल सुधार समिति, आमा समुहसहित समुदायमा रहेका हरेक संघसंस्थाहरुलाई समेटेर योग, मेडिटेसन, ट्रयाकिङका कार्यक्रम गरिने उनले बताए । यसैगरि प्रभातफेरि, सार्वजनिक स्थल र सवारी साधनहरुमा पर्चा वितरण गर्ने, मानसिक स्वस्थ्य शिविरहरु, विभिन्न मिडियाहरुमा प्रचारका कार्यक्रम, मनोचिकित्सा केन्द्र, पुनर्वास केन्द्र र परामर्श केन्द्रहरुसंग डिष्ट्रिक तथा क्लबहरुले सहकार्य गर्ने छन । लक्षित वर्गहरुलाई आवश्यक सामग्रीहरु वितरण गर्ने वा सहयोग गर्ने कार्यक्रम गरिने उनले बताए । लायन्सद्धारा दृष्टि/नेत्र स्वास्थ्य, युवा सशक्तिकरण, प्रकोप राहत, मानवीय सहायता, मधुमेह, बाल–क्यान्सर, भोक÷खाद्य असुरक्षा, पर्यावरण गरि आठ वटा ग्लोबल कजमा समुदायमा केन्द्रित भएर सेवा गर्दै आएकोमा यो वर्ष एउटा थप गरि नौ वटा बनाईएको उनले बताए । विश्व स्वस्थ्य संगठनका अनुसार नेपालमा ६० लाख मानिसमा कुनै न कुनै किसिमका मानसिक स्वस्थ्यको समस्या रहेको तथा त्यसमध्ये करिब ५ लाख मानिसहरुमा कडा किसिमको मानसिक समस्या रहेको छ । यसैगरि नेपालमा वर्षेनी ६ हजार बढि मृत्यु आत्महत्याबाट हुने गरेको र त्यसमध्ये ९० प्रतिशत मृत्यु आत्महत्याका कारण र आत्महत्या गर्नेमध्ये ८० प्रतिशत उदासिनताका कारण हुने उनले बताए । विश्व स्वस्थ्य संगठनका अनुसार ४ जनामा १ जनामा मानसिक समस्या हुने गरेको छ ।

कार्यक्रममा ग्लोबल डिष्ट्रिक मेन्टल हेल्थका संयोजक ओम कुमार श्रेष्ठले मानसिक स्वस्थ्य र नेपाली समाजको अवस्थाबारेमा प्रकाश पारे । शरिरमा चोट पटक लागेर बिरामी हुनेजस्तै मन वा भावनामा पिडा पुगेको अवस्थामा मानसिक समस्या हुने बताए । अझ त्यसमा पनि चिन्ता सम्बन्धी समस्या, मूड समस्या, व्यक्तित्व विकार, साइकोटिक समस्या, आघात÷तनाव समस्या, खानपान समस्या, नशा÷लत समस्या, बालबालिकासम्बन्धी समस्या लगायतका हुन्छन । समाजमा अझै पनि मानसिक स्वस्थ्यका बारेमा रहेका गलत, अमानविय र अवैज्ञानिक मान्यताहरुलाई चिर्न जरुरी रहेको उनले बताए ।

कार्यक्रममा पिजिडि तथा मेन्टल हेल्थ मनिटर महेन्द्र नारायण श्रेष्ठले विश्वका विकसित राष्ट्रका मानिसहरु सबैभन्दा धेरै मानसिक समस्याबाट ग्रसित रहेको तथ्याक सार्वजनिक भएको भन्दै धनसम्पति आर्जन भन्दा पनि जिवनशैलीलाई सरल बनाउन जरुरी रहेको बताए । लायन्स यसवर्ष नया थिमलाई थपेर विश्वभरमै समुदायमा जान लागेको उनले बताए ।

कार्यक्रममा फष्ट भिडिजी सन्दिप कशौधन, लायन्स डिष्ट्रिक सप्ताहब्यापी मानसिक स्वस्थ्य कार्यक्रमका संयोजक उमेश आचार्यले लायन्सको नया कार्यक्रम र देशमा आएको राजनीतिक परिवर्तन जस्ता विषयलाई मध्येनजर गरि विशेष प्राथमिकतामा राखेर कार्यक्रम गर्न लागेको बताए । जीवनविज्ञान लुम्बिनी प्रदेशसंग समन्वय गरि सकारात्मक सोच र जीवनविज्ञानका कक्षाहरु संचालनको तयारी रहेको छ । हाल डिष्ट्रिक अन्तरगत १५९ क्लबहरु छन भने त्यसमा ३५०० बढी सदस्यहरु छन ।