खोज

बुटवल, २५ मंसिर ।

रुपन्देही उद्योग संघले नेपाल उद्योग परिसंघ र लुम्बिनी प्रदेश उद्योग परिसंघसँगको संयुक्त आयोजनामा गर्न लागेको राष्ट्रिय औद्योगिक प्रदर्शनीमा मनोरन्जनात्मक कार्यक्रमलाई विशेष प्राथमिकता दिइने भएको छ । “संमृद्ध नेपाल निर्माणको आधार, स्वदेशी उद्यमशिलताको विस्तार” भन्ने मूल नाराका आगामी पुस ७ देखि बुटवलमा गर्न लागेको १५ औं राष्ट्रिय औद्योगिक प्रदर्शनी, कृषि, प्रविधि तथा पर्यटन महोत्सव–२०७९ मा मनोरञ्जनात्मक कार्यक्रमहरूलाई विशेष प्राथामिकता दिइएको आयोजकले बताएका छन् ।

रूपन्देही उद्योग संघले प्रदर्शनी स्थलमा औद्योगिक वस्तुहरुको अवलोकन गर्ने प्रवन्ध मिलाउनुका साथै राष्ट्रिय÷स्थानीय कलाकारहरूलाई जमघट गराई अवलोलकन गर्न आउने दर्शकहरूलाई मनोरञ्जन प्रदान गराउने योजना वनाएको प्रदर्शनी मूल आयोजक समितिका सदस्य सचिव हरि बहादुर खत्रीले बताए ।

सांस्कृतिक कार्यक्रम उपसमितिका संयोजक मोहनीलाल रिजालले प्रदर्शनी अवधिभर राष्ट्रिय र स्थानीय कलाकारहरूको प्रस्तुती रहने जानकारी दिए । ‘हामीले राष्ट्रिय ख्यातिप्राप्त, लोकदोहारी, आधुनिक, पप, हाँस्यव्यङग्य कलाकारदेखि जिल्लामा बसेर कलाकारितामा रमाएका सफल कलाकारहरूको जमघट गराउने योजना बनाएका छौं’ रिजालले भने, ‘प्रदर्शनीमा दर्शकहरूलाई मनोरञ्जन प्रदान गर्न कुनै कमी रहने छैन ।’

त्यसैगरी प्रदर्शनीमा लोक संस्कृतिलाई जोगाउने उद्देश्यका साथ राष्ट्रिय लोक तथा दोहोरी गीत प्रतियोगिता, अन्तर विद्यालय लोक नृत्य प्रतियोगिता, अन्तर कलेज बक्तृत्वकला प्रतियोगिता, लोक भजन समेत राखिएको छ । लोकदोहोरी प्रतियोगितामा विजेताले ७५ हजार ५५५ रुपैया प्राप्त गर्नेछन् भने दोस्रो हुनेलाई ३७ हजार ५५५ रुपैया पुरस्कार प्रदान गरिने छ ।

रुपन्देही उद्योग संघले सुरुवात गरेको नयाँ कलाकार उत्पादन गर्न प्रदर्शनी आइडल प्रतियोगितालाई पनि यसपटक निरन्तरता दिने निर्णय भएको छ । प्रदर्शनी आइडलको छैटौं सिजनको विजेताले १ लाख ११ हजार १११ प्राप्त गर्नेछ भने उपविजेताले ५५ हजार ५ सय ५५ रुपैया नगद पुरस्कार पाउने छ । प्रदर्शनी आइडलमा विजेता बनेका कलाकार प्रिया भण्डारी, एन्जिला रेग्मी अहिले नेपाली गित संगितमा शिखरमा पुगेका छन् ।

त्यस्तै प्रदर्शनीमा नयाँ विधाका रुपमा प्रदर्शनी टिकटक हन्ट आयोजना गरिदै छ । चर्चित टिकटक कलाकारहरुलाई समावेश गरी आयोजना गरिने उक्त प्रतियोगितामा विजेताले २० हजार ५५५ प्राप्त गर्नेछन । त्यस्तै संस्कृतिको संरक्षण गर्न विभिन्न जनजातिका भेषभुषा र संस्कृति झल्किने प्रस्तुति रहने छ ।

‘संमृद्ध नेपाल निर्माणको आधार, स्वदेशी उद्यमशिलताको विस्तार’ भन्ने मूल नाराका साथ सञ्चालन हुने प्रदर्शनी पुस १९ गतेसम्म चल्नेछ । प्रदर्शनीको तयारीको कामहरु भैरहेको प्रदर्शनी मूल आयोजक समितिका सहसंयोजक दिलिप सापकोटाले जानकारी दिए । स्वदेशी उत्पादनको प्रदर्शन र बजारीकरण गर्ने उद्देश्यका साथ प्रदर्शनी आयोजना गरिएको हो । आधुनिक प्रदर्शनी केन्द्रमा हुने प्रदर्शनीमा विभिन्न ९ प्याविलियनमा करिव ४ सय स्टलहरु समावेश गरिने प्रदर्शनी प्रबन्धक यादव प्रसाद भण्डारीले जानकारी गराए ।