खोज

 काठमाडौं,२६ भदौ ।
नेकपा (माओवादी केन्द्र) का अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ ले जेनजी युवाहरूले उठाएका माग संविधान र संसदीय प्रक्रियाभित्रै समाधान हुन सक्ने बताएका छन् ।  उनका अनुसार संविधानबाहिर वा संसदको शून्यतामा निकास खोज्ने प्रयासले प्रतिगमनलाई मात्र फाइदा पुर्‍याउनेछ ।

प्रेस विज्ञप्ति जारी गर्दै प्रचण्डले भने, “लोकतन्त्रको विकल्प अझ सुदृढ लोकतन्त्र हो, गणतन्त्रको विकल्प अझ सबल गणतन्त्र हो । जेनजी पुस्ताको माग न लोकतान्त्रिक व्यवस्था र संविधानविरुद्ध थियो, न संसद् विघटनकै पक्षमा । ती माग संविधान र संसदीय प्रक्रियाभित्रै पूरा गर्न सकिन्छ भन्नेमा हामी विश्वस्त छौं ।”

उनले अहिलेको संविधानलाई कैयौँ कमजोरी भए पनि सामाजिक न्याय र समावेशिताका दृष्टिले तुलनात्मक रूपमा उत्कृष्ट बताए । “संविधानसम्मत तरिकाले मात्रै संक्रमणकालीन अवस्थाको निकास सम्भव छ, संविधान र संसदको शून्यतामा खोजिने निकास प्रतिगमनलाई फाइदा पुर्‍याउनेछ,” विज्ञप्तिमा उल्लेख छ ।

प्रचण्डले संविधान कार्यान्वयनमा देखिएका चुनौतीहरूको गम्भीर समीक्षा आवश्यक रहेको भन्दै समावेशी लोकतन्त्रको रक्षा गर्दै प्रत्यक्ष कार्यकारी प्रणालीतर्फ संविधान संशोधन गर्न सके मात्र लोकतन्त्रलाई सबल बनाउन सकिने धारणा राखे । उनले आन्दोलनकारी युवाहरूले पनि यही पक्षलाई संवेदनशीलतापूर्वक आत्मसात गर्ने विश्वास व्यक्त गरे ।

त्यसैगरी उनले आन्दोलनका क्रममा भएको दमन र मानवीय क्षतिप्रति दुःख प्रकट गर्दै उच्चस्तरीय न्यायिक छानबिनको माग गरेका छन् । सार्वजनिक संरचना र निजी सम्पत्तिमा भएको आगजनी तथा तोडफोडलाई जेनजी आन्दोलनकारीसँग जोड्नु गलत भएको उनको भनाइ छ ।

विज्ञप्तिमा उनले सबै पक्षलाई संयमता, उच्च सुझबुझ र संवादमार्फत शान्तिपूर्ण निकास खोज्न आह्वान गरेका छन् । साथै, राष्ट्रपति, सुरक्षा निकाय र राजनीतिक शक्तिहरूले संविधानसम्मत समाधानमा भूमिका खेल्ने विश्वास व्यक्त गरेका छन् ।