खोज

भैरहवा, १९ भदौ ।

पछिल्ला तीन दिनमा रुपन्देहीका विभिन्न ठाउँबाट प्रहरीले अलग–अलग घटनामा ठुलो मात्रामा लागू औषध र अवैध रकमसहित तीन जनालाई पक्राउ गरेको छ । प्रहरीका अनुसार पक्राउ परेका सबैलाई थप अनुसन्धानका लागि हिरासतमा राखिएको छ ।

जिल्ला प्रहरी कार्यालय रुपन्देहीका प्रवक्ता प्रहरी नायब उपशिक्षक सुरज कार्कीका अनुसार भदौ १५ गते बेलुका ८ बजेको समयमा प्रहरीले सिद्धार्थनगर नगरपालिका–२ मेउडिहवास्थित एक डेराबाट २६ वर्षीय ईर्फान अन्सारीलाई पक्राउ गरेको छ ।

लागु औषध कारोबार गरिरहेको गोप्य सूचनाको आधारमा उनको कोठामा खानतलासी गर्दा प्रहरीले १ ग्राम ७३० मिलिग्राम ब्राउन सुगर फेला पारेको थियो ।

यसै गरी, भदौ १६ गते बिहान करिब ११ बजे इलाका प्रहरी कार्यालय बेलहियाको टोलीले सिद्धार्थनगर नगरपालिका–१ बन्दरगाहामा चेकजाँचका क्रममा २६ वर्षीय प्रेमलाल यादवलाई नियन्त्रणमा लिएको छ ।

यादवको साथबाट १ ग्राम ०३ मिलिग्राम ब्राउन सुगर बरामद भएको छ । उनी सवार लु.प्र.०१–००१ प १३५१ नम्बरको मोटरसाइकल र दुई थान मोबाइल पनि प्रहरीले बरामद गरेको छ ।

कार्कीका अनुसार भदौ १७ गते दिउँसो साढे ४ बजे रोहिणी गाउँपालिका–६ का ३५ वर्षीय ईरसाद प्रवेजलाई प्रहरीले ओमसतिया गाउँपालिका–४ बाट पक्राउ गरेको छ । लागू औषध कारोबार भइरहेको सूचनाको आधारमा प्रहरीले उनलाई यूपी ५६ एएक्स ८१३४ नम्बरको मोटरसाइकलमा जाँदै गर्दा रोकेको थियो ।

उनको मोटरसाइकलको लेगार्डबाट २९३ एम्पुल लागू औषध बरामद भएको छ । प्रवेजको घरमा खानतलासी गर्दा प्रहरी थप चकित भएको थियो । उनको सुत्ने कोठामा रहेको गहुँ राख्ने टिनको भाँडोमा लुकाएर राखेको अवस्थामा १० लाख २० हजार रुपैयाँ अवैध रकम, २६० वटा स्पास्मो क्याप्सुल, र एउटा मोबाइल पनि बरामद भएको कार्कीले जानकारी दिए ।