खोज

अर्घाखाँची, १७ भदौ ।

अर्घाखाँचीको सन्धिखर्क नगरपालिका–३ का घरधुरीले प्रयोग गर्ने न्यूनतम विद्युत् महसुल वडा कार्यालयले तिरिदिने भएको छ ।

वडा भित्र रहेका घरधुरी जसले मासिक २० युनिट बराबरको मात्र विद्युत् उपभोग गर्छन्, ती सबैको विद्युत् महसुल वडा कार्यालयले तिरिदिने निर्णय भएको वडाध्यक्ष जम्शेर मियाले बताए ।

स्थानीय सरकारले वडाका सबै नागरिकको न्यूनतम २० युनिट बराबरको विद्युत् उपभोग गर्दा आउने रकम तिर्ने भएपछि स्थानीय बासीन्दा खुसी भएका छन् ।

वडाध्यक्ष जम्शेर मियाका अनुसार, यो योजना आगामी असोज १ गते देखि लागु भई चालु आर्थिक वर्ष २०८३ को असार मसान्तसम्म सञ्चालन हुनेछ ।

वडाले जारी गरेको सार्वजनिक सूचनामा उल्लेख भएअनुसार, यो योजना गरिब तथा विपन्न परिवारहरू मात्र नभई वडा नम्बर ३ मा रहेका सबै घरधुरीमा लागु हुन्छ, सूचनामा उल्लेख छ, प्रत्येक घरधुरीको मासिक विद्युत् उपभोग २० युनिट वडाले तिरिदिने भएको हो ।

योजना अन्तर्गत लाभ लिन इच्छुक घरधुरीहरूले विद्युत् ग्राहक नम्बर र नागरिकता प्रमाणपत्र लिएर वडा कार्यालयमा निवेदन दर्ता गराउनुपर्नेछ ।

वडाले सामाजिक उत्तरदायित्वअन्तर्गत यस्तो कार्यक्रम ल्याएको हो, जसले स्थानीय तहको सेवा प्रवाहमा पारदर्शिता र जनहितमा आधारित कार्यशैलीको उदाहरण पेस गर्ने वडाको भनाई छ ।

विद्युत् प्रयोगमा हुने बचतसँगै वडाका जनप्रतिनिधि, कर्मचारी र नागरिकबिचको सहकार्य बलियो बनाउन पनि यो निर्णय सहयोगी हुने अपेक्षा गरिएको वडाले जनाएको छ ।