खोज

काठमाडौँ ।

अफगानिस्तानमा गएको ६ म्याग्निच्युडको शक्तिशाली भूकम्पका कारण हालसम्म मृत्यु हुनेको संख्या ६२२ पुगेको छ भने  १,५०० भन्दा बढी घाइते भएका छन् ।

भूकम्पले विशेषगरी पूर्वी प्रान्त कुनार र नंगरहारमा ठूलो क्षति पु¥याएको छ ।  कुनारमा मात्र ६१० जनाको ज्यान गएको छ भने नंगरहारमा १२ जनाको मृत्यु पुष्टि भएको छ। कुनारका तीनवटा गाउँहरू पूर्ण रूपमा ध्वस्त भएका छन् ।

भूकम्पको केन्द्र जलालावाद शहरदेखि २७ किलोमिटर टाढा, १० किलोमिटर गहिराइमा रहेको बताइएको छ । मध्यरातमा आएको यो कम्पनको असर पाकिस्तानको राजधानी इस्लामावादसम्म झण्डै ४०० किलोमिटर टाढासम्म महसुस गरिएको थियो ।

प्रभावित क्षेत्रहरूमा माटो र ढुंगाले बनेका ग्रामीण बस्तीहरू व्यापक रूपमा क्षतिग्रस्त भएका छन् । सञ्चारमाध्यमहरूमा आएका भिडिओ फुटेजहरूमा हेलिकोप्टरमार्फत उद्धार भइरहेको देखिन्छ ।

भग्नावशेषमा हराइरहेका व्यक्तिहरूको खोजी कार्य जारी रहेकोले मृतकको संख्या अझै बढ्न सक्ने अनुमान गरिएको छ ।

अफगानिस्तानको आन्तरिक मन्त्रालयका प्रवक्ता अब्दुल मतेन क्वानीका अनुसार सुरक्षा, स्वास्थ्य सेवा र खाद्य सामग्रीको वितरणका लागि सबै उपलब्ध उद्धार टोलीहरू परिचालन गरिएका छन् ।

गृहयुद्ध, गरिबी र अन्तर्राष्ट्रिय सहायता अभावको चपेटामा रहेको अफगानिस्तानमा आएको यो विपत्तिले मानवीय संकट झनै गहिरो बनाएको छ ।

पछिल्लो पटक सन् २०२२ मा ६.१ म्याग्निच्युडको भूकम्प जाँदा करिब एक हजार जनाको मृत्यु भएको थियो । त्यसयताकै ठूलो भूकम्प यही हो ।

सरकारी तथा गैरसरकारी निकायहरूले संयुक्त रूपमा राहत र पुनःस्थापनाको प्रयास तीव्र पारेका छन् । भूकम्प र बाढीको दोहोरो मार खेपिरहने अफगानिस्तानका ग्रामीण क्षेत्रमा उद्धारकर्ताहरूले अझै चुनौतीपूर्ण अवस्था भोगिरहेका छन् ।