खोज

बुटवल, १५ भदौ । 

नेकपा (माओवादी केन्द्र) का अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ ले सहिद स्मृति प्रतिष्ठान, रुपन्देहीका संस्थापक अध्यक्ष स्व. रामप्रसाद बञ्जाडे ‘टंकमणि’ को अर्धकद शालिक अनावरण गरेका छन ।

आइतबार बुटवल–११, माझगाउँस्थित प्रतिष्ठानको कार्यालय परिसरमा आयोजित विशेष समारोहमार्फत शालिक अनावरण गरिएको हो । सो अवसरमा टंकमणिको जीवनी, योगदान र संघर्षलाई समेटिएको स्मृति ग्रन्थ “टंकमणि : एक क्रान्तिबीज” को विमोचन समेत गरिएको थियो । कार्यक्रमलाई सम्बोधन गर्दै अध्यक्ष प्रचण्डले माओवादी जनयुद्ध सफल बनाउन तत्कालीन सप्लाई विभागको योगदानलाई ऐतिहासिक भन्दै स्मरण गर्दै टंकमणिले सप्लाई विभागमा रहेर १० वर्षे जनयुद्धलाई सफल बनाउन विशेष भूमिका खेलेको उल्लेख गर्दै उनलाई “साहसी र जिम्मेवार योद्धा” को रुपमा व्याख्या गरे।

आगामी दिनमा टंकमणिको योगदानलाई बिशेष मूल्याङकन गरी परिवारलाई संरक्षण र पार्टिको जिम्मेबारी प्रदान गर्ने प्रतिबद्धता व्यक्त गरे । बुटवल उपमहानगरपालिका प्रमुख खेलराज पाण्डेले टंकमणि माओवादी मात्र नभई समग्र समाजकै नेता भएको उल्लेख गर्दै परिवर्तनका लागि लड्ने योद्धाहरूको योगदानको कदर उपमहानगरले गर्दै आएको बताए ।

उनले आफू कांग्रेस–माओवादी गठबन्धनबाट निर्वाचित भएको स्मरण गर्दै केन्द्रमा गठबन्धन भत्किए पनि पालिकामा भने गठबन्धनको मर्मअनुसार सहकार्य भइरहेको स्पष्ट पारे । सो अवसरमा पार्टीका उपमहासचिव वर्षमान पुन, सचिव तथा लुम्बिनी प्रदेश इन्चार्ज चक्रपाणि खनाल, पूर्वसभामुख ओनसरी घर्ति, पूर्वमन्त्री रेखा शर्मा, लुम्बिनी प्रदेशका पूर्वमुख्यमन्त्री कुलप्रसाद केसी, नेता जोखबहादुर महरा, प्रदेश अध्यक्ष सुदर्शन बरालसहितका नेताहरूको उल्लेख्य उपस्थिति थियो ।

स्व. टंकमणिको निधन २०७८ मंसिर ८ गते बुटवलको बेलबासमा सवारी दुर्घटनामा ५५ वर्षको उमेरमा भएको थियो । उनी पार्टिका निडर र अग्रपङक्तिमा खटिने शाहासी योद्वाका रुपमा स्थिापित व्यक्ति हुन ।