खोज

समाचार सारांश

• ---

  बिहारमा विधान सभा चुनाव अघि आतङ्कवादी खतरा उच्च भएको गुप्तचर सूचनामा जनाइएको छ ।

  

• पाकिस्तानको प्रतिबन्धित सङ्गठन जैश–ए–मोहम्‍मदसँग आबद्ध तीन जना आतङ्कवादी नेपाल हुँदै बिहार प्रवेश गरेको भनिएको छ ।

• ती आतङ्कवादीहरू साउन दोस्रो सातातिर काठमाडौँ पुगेका थिए र त्यसपछि भारत प्रवेश गरेका हुन् ।

  ---

पटना, १२ भदौ ।

विधान सभा चुनावअघि बिहारमा आतङ्कको खतरा बढ्दै गएको छ । गुप्तचर सूचना पछि पुरै राज्यमा उच्च सतर्कता जारी गरिएको छ।

प्राप्त जानकारी अनुसार पाकिस्तानको प्रतिबन्धित सङ्गठन जैश–ए–मोहम्‍मदसँग आबद्ध तीन जना आतङ्कवादी नेपाल हुँदै बिहार प्रवेश गरेको दाबी गरिएको छ ।

उनीहरू हसनैन अली, आदिल हुसैन र मोहम्मद उस्मान रहेको भारतीय मिडियाहरूले उल्लेख गरेको छ । बिहारमा विधान सभा चुनाव नजिकिँदै गर्दा आतङ्कवादी गतिविधिको आशङ्का बढेको छ ।

प्रहरी मुख्यालयलाई प्राप्त महत्त्वपूर्ण गुप्तचर सूचना पछि पुरै राज्यमा उच्च सतर्कता जारी गरिएको हो । सूचनाअनुसार पाकिस्तानका तीन आतङ्कवादी नेपाल मार्ग हुँदै बिहार प्रवेश गरिसकेका छन् ।

यी आतंकवादीहरू प्रतिबन्धित सङ्गठन जैश–ए–मोहम्‍मदसँग आबद्ध रहेको पाइएको छ । उनीहरूको परिचय रावलपिण्डी निवासी हसनैन अली, उमरकोट निवासी आदिल हुसैन र बहावलपुरका मोहम्मद उस्मानका रूपमा भएको छ ।

जानकारी अनुसार ती तीनै जना आतङ्कवादी साउन दोस्रो सातातिर काठमाडौँ पुगेका थिए र त्यहाँबाट गत हप्तामै सीमा पार गरी बिहार प्रवेश गरेका हुन् ।

भारतीय प्रहरी मुख्यालयले यस सूचनालाई अत्यन्त गम्भीरताका साथ लिएको छ। तीनै आतङ्कवादीको पासपोर्ट तथा अन्य विवरण सीमावर्ती जिल्लाहरूको प्रशासन र सुरक्षा निकायसँग साझा गरिएको छ।

विशेष गरी नेपालसँग जोडिएका क्षेत्रमा सुरक्षा व्यवस्था अझ कडाइ गरिएको छ । गुप्तचर स्रोतहरूका अनुसार यी आतंकवादीहरूले देशको जुनसुकै क्षेत्रमा आतंकी घटना गराउन सक्ने सम्भावना छ।

बिहार विधान सभा चुनावलाई दृष्टिगत गर्दा यो सतर्कता अझ संवेदनशील मानिएको छ, किनभने आतंकवादीहरूले कुनै ठूलो राजनीतिक सभा वा भीडभाड भएको कार्यक्रममा आक्रमण गर्न सक्ने आशङ्का गरिएको छ।

प्रहरी मुख्यालयले सबै जिल्लाका प्रहरी प्रमुखहरू र गुप्तचर संयन्त्रलाई सतर्क रहन निर्देशन दिएको छ। साथै, शङ्कास्पद गतिविधि माथि नजर राख्न, निरन्तर सूचना सङ्कलन गर्न र कुनै पनि सुराग भेटिए तुरुन्त कारबाही गर्न भनिएको छ ।

बिहार प्रहरी यस बेला पूर्ण अलर्ट मोडमा छ र सीमावर्ती जिल्लाहरूमा खोज तथा अनुसन्धान अभियान तीव्र पारेको छ । सुरक्षा निकायहरू कुनै पनि किसिमको आतंकी गतिविधि राज्यमा हुन नदिन जुटेका छन् ।