खोज

काठमाडौँ, १२ भदौ ।

भारतको जम्मू कश्मीरको रियासी जिल्लामा रहेको माता वैष्णो देवी धाम जाने बाटोमा भारी वर्षाका कारण पहिरो गएको छ । दुर्घटनामा ३२ जना भक्तजनको मृत्यु भएको छ भने करिब २० जना घाइते भएको भारतीय मिडियाहरूले उल्लेख गरेका छन् ।  राहत तथा उद्धार कार्य भइरहेको बताइएको छ ।

वैष्णो देवी मन्दिर जाने बाटोमा रहेको अर्धकुँवारी गुफा मन्दिरको इन्द्रप्रस्थ भोजनालय नजिकै पहिरो गएको छ । त्रिकुटा पहाडमा रहेको मन्दिर मार्गको ठूलो भाग भग्नावशेषले ढाकिएको छ । भग्नावशेष मुनि धेरै मानिसहरू दबिएको हुन सक्ने आशङ्का गरिएको छ ।

सेना र प्रशासन राहत तथा उद्धार कार्यमा संलग्न छन् । जम्मू कश्मीरमा निरन्तर वर्षाले बाढी र पहिरोको अवस्था सिर्जना गरेको छ । जम्मूमा ओभरब्रिज भत्किएका छन्, बिजुलीका तार र मोबाइल टावरहरूमा क्षति पुगेको छ भने तीन पुलमा क्षति पुगेको उल्लेख छ ।

मंगलबार श्री माता वैष्णो देवी मार्गमा पहिरो गएपछि यात्रा रोकिएको छ । ११ वर्ष पछि, मंगलबार यस क्षेत्रमा यस्तो पानीको विनाश देखिएको बताइएको छ ।

अविरल वर्षाले जम्मू डिभिजनका सबै प्रमुख नदीहरू खतराको चिन्हभन्दा माथि बगिरहेका छन् भने प्रभावित क्षेत्रका सयौं मानिसहरू सुरक्षित स्थानहरूमा शरण लिएका छन् । जम्मू–श्रीनगर राष्ट्रिय राजमार्ग जम्मूदेखि रामबनसम्मका लगभग १२ स्थानमा पहिरोका कारण बन्द रहेको छ ।

पक्की पुल पठानकोटमा बाढीले क्षति गरेपछि कारण जम्मू, उधमपुर, कटरा जाने १८ वटा रेलहरू रद्द गरिएका छन् ।