खोज

पाल्पा, १ भदौ ।

नेपाल सरकारका उपप्रधान तथा अर्थमन्त्री विष्णुप्रसाद पौडेलले कांग्रेस–एमाले नेतृत्वको वर्तमान सरकार २०८४ सालसम्म यथावत् रहने दाबी गरेका छन् ।

नेपाल पत्रकार महासंघ पाल्पाद्वारा आइतबार तानसेनमा आयोजित पत्रकार भेटघाट कार्यक्रममा बोल्दै उपप्रधानमन्त्री पौडेलले सरकार ढल्ने भ्रममा नपर्न सबैलाई आग्रह गरे ।

उनले पूर्वप्रधानमन्त्री पुष्पकमल दाहालप्रति संकेत गर्दै सरकार ढल्छ भनेर भ्रम छर्नेहरू अहिले आफूहरू सरकारबाट टाढा रहेको बताए । विरोधको राजनीति गरेर मात्र देश बन्न नसक्ने उल्लेख गर्दै आलोचनामा रमाउनभन्दा बाहिर निस्केर राष्ट्र निर्माणमा लाग्न सबै दललाई आग्रह गरे।

राजनीतिक स्थायित्वको सन्दर्भमा उनले अहिलेका नयाँ दलहरूलाई बर्खाको खहरे खोलासँग तुलना गर्दै स्थायित्व र दीगो विकास सुनिश्चित गर्नका लागि कांग्रेस र एमाले सरकार २०८४ सम्म रहने उल्लेख गरे ।

पाल्पामा आयोजना हुने पश्चिम नेपालको प्रसिद्ध भगवती जात्रा अवलोकन गर्न आएका उपप्रधानमन्त्री पौडेलले पाल्पाको विकासका लागि सरकारले हालैको बजेटमा पर्याप्त प्राथमिकता दिएको जानकारी पनि दिए।

उनका अनुसार सिद्धार्थ राजमार्ग स्तरोन्नति, कालीगण्डकी करिडोरको निर्माण सम्पन्न, कालीगण्डकी डाइभर्सन, माडी चक्रपथ, बल्डेङ्गगढीदेखि बाकामलाङसम्मका पूर्वाधार विकासमा सरकारको विशेष ध्यान केन्द्रित गरिएको छ।

तानसेनको ऐतिहासिकता र पुरातात्त्विक महत्वलाई संरक्षण गर्दै विकासका योजना अघि बढाइने प्रतिबद्धता पनि उनले जनाए।