खोज

बुटवल, ३१ साउन ।

अर्घाखाँची धातिवाङ्ग- रुपन्देही सम्पर्क समाजको आयोजनामा यस वर्ष पनि तिज मिलन कार्यक्रम उत्साहपूर्वक सम्पन्न भएको छ। पाणिनि गाउँपालिका वडा नं. ६ का  वडा अध्यक्ष कृष्णप्रसाद पौडेलले सम्पर्क समाजले कर्मथलोमा रहदाँ पनि जन्मभूमिप्रति देखाएको भावना कायम राखेर परम्परा र संस्कृतिलाई जोगाइराखेकोमा प्रशंसा गरे।

उनले समाजले आयोजना गरेको तिज मिलन जस्ता कार्यक्रमहरूले चेलीबेटी र समुदायबिच आपसी सद्भाव, सम्बन्ध विस्तार र नयाँ पुस्तामा संस्कृति हस्तान्तरण गर्ने कार्यमा ठुलो योगदान पुर्‍याउने विश्वास व्यक्त गरे।

धातिवाङ्गबासीलाई जहाँ भए पनि गाउँको विकास र पहिचानमा सहकार्य गर्न आग्रह गर्दै आगामी दिनमा समाजलाई अझ व्यवस्थित र सक्रिय बनाउन आफ्नो साथ सहयोग रहने पौडेलको भनाइ रहेको थियो ।

धातिवाङ्ग रुपन्देही सम्पर्क समाजका अध्यक्ष पिताम्बर पाण्डे, संस्थापक अध्यक्ष थानेश्वर पाैडेल, वडा सदस्य खगेश्वर पाैडेल र हरिप्रसाद पाैडेल, सल्लाहकार जनार्दन पाैडेल तथा हरिप्रसाद पाैडेल, सिद्वेश्वर बहुउद्देश्यीय सहकारी संस्थाका सचिव पुष्कर पाैडेल, संस्थाका उपाध्यक्ष गंगा पाैडेल, सचिव हरिप्रसाद घिमिरे, कार्यसमिति सदस्य गाैरी पाैडेल लगायतले मन्तव्य राख्दै संस्कृतिको जर्गेनाका लागि सबै एकजुट हुनुपर्ने बताएका थिए ।

कार्यक्रममा रुपन्देहीमा बसोबास गरिरहेका धातिवाङ्गमा जन्मिएका चेलीबेटी तथा धातिवाङ्गबासीको उल्लेख्य उपस्थिति रहेको थियो । तीज पर्वलाई महिलाहरूको मात्र उत्सव नभई समुदायबिचको एकता, सांस्कृतिक जगेर्ना र भेटघाटको अवसरका रूपमा मनाउनुपर्नेमा वक्ताले जोड दिएका थिए  ।

कार्यक्रममा गायिका सम्झना रणपालकाे प्रस्तुति सहित नाचगान गरिएको हो । तीज मिलनलाई हरेक वर्ष निरन्तर आयोजना गर्दै आएको धातिवाङ्ग रुपन्देही सम्पर्क समाजले उत्साहपूर्वक सम्पन्न भएको हो ।