खोज

बुटवल, १८ मंसिर ।

रुपन्देहीका नौवटा सहकारी संस्थाहरु एकीकरण (मर्जर) भएका छन् । रुपन्देही, नवलपरासी र कपिलवस्तुका सहकारी एकीकरण घोषणा गरिएको हो । सार्थक, आगन्तुक, शाईन, उपदेश, उपकार, जनप्रिय, सुसन्देश शुभश्री, वरदान बहुउद्देश्यीय सहकारी संस्थाहरुका पदाधिकारी, शेयर सदस्यहरुको सहभागितामा शनिबार मर्जर गरिएको हो ।

कार्यक्रमको उदघाटन गर्दै राष्ट्रिय सहकारी बैकका अध्यक्ष केपि उप्रेतीले सहकारीको अहिले सृजना भएको भ्रम तोड्ने गरी केन्द्रबाट काम सुरु भएको बताए । सहकारी क्षेत्रमा भएका खराबीका कारण मात्र नभई यसमा अन्य धेरै तत्वहरु समावेश रहेको उनले बताए । देशकै आर्थिक अवस्था कोभिड १९ संक्रमणभन्दा पनि जटिल रुपमा देखिएको उनले दाबी गरे । राष्ट्रिय अर्थतन्त्रमा सरकारकै कारण आर्थिक संकट आएको उनले बताए ।

कार्यक्रममा राष्ट्रिय सहकारी संघका संचालक तथा जिल्ला सहकारी संघका अध्यक्ष भिम तुलाचनले एकीकरण आफैमा नया उर्जा थप्ने अभियान भएको बताए । शब्दमात्र सिमित नभई कार्यान्वयन गर्न सुझाव दिदै उनले सहकारीको परिभाषा र नारालाई अक्षरशः पालना गरेर अघि बढ्नुपर्ने बताए । कार्यक्रममा राष्ट्रिय सहकारी बैकमा संचालक माधवलाल देवकोटाले सहकारीको आधारभुत मूल्य मान्यतालाई समेत कार्यान्वयन नगर्दा सहकारी डुब्नेसम्मको अवस्था आएको बताए । प्रतिवद्घतासहित सुधार ल्याउने बाहेक अन्य कुनै बिकल्प नरहेको उनले बताए । हाल रुपन्देहीमा ७ सय सहकारीहरु छन् ।

कार्यक्रममा नेपाल बचत तथा ऋण सहकारीका संचालक सन्दिप सापकोटाले सहकारी समस्यामा गुज्रिएको बताए । सिद्धबाबा बहुउद्देश्यीय सहकारी संस्था गठन गर्ने गरी प्रस्तावित नाम सहित यी सहकारीहरु एकीकरण भएका हुन् । तदर्थ समितिका अध्यक्ष प्रकाश खनालका अनुसार मर्जर पश्चात सहकारीको कुल निक्षेप संकलन ३३ करोड ४४ लाख ७२ हजार २ सय ८७ हुने छ । यस्तै कर्जा प्रवाह २९ करोड ६२ लाख ८५ हजार ९ सय ८२ हुने बताइएको छ ।

एकीकरण पश्चात हुने तरलता १२.६९ प्रतिशत कायम हुने जानइएको छ । यस्तै अचल सम्पत्ति २ करोड ८१ लाख ६७ हजार १ सय ४७ र शेयर पुँजी ३ करोड ७१ लाख ४२ हजार ३ सय ३ रुपैयाँ हुनेछ भने एकीकरण पश्चत शेयर सदस्यहरुको संख्या २२ हजार ४ सयस १३ जना रहने छन् ।