खोज

टोकियो।

गैर-आवासीय नेपाली संघ (एनआरएनए) जापानको आसन्न निर्वाचनको माहोलमा अध्यक्ष पदका उम्मेदवार सिद्धार्थ श्रेष्ठको चुनावी अभियानले नेतृत्व कुनै आकस्मिक लहर वा चामत्कारिक प्रस्तुति नभई यो लामो समयको यात्रामा इँटा-इँटा थपेर बनाइएको बलियो घर जस्तै हो, जसले हरेक आँधीहुरीमा सुरक्षाको प्रत्याभूति दिन्छ भन्ने कुराको प्रष्टरुपमा संकेत देखिन्छ! एक दशक लामो समर्पण र यात्राको एक जीवन्त दस्तावेज हुन् सिद्धार्थ।

पदको आकांक्षाभन्दा माथि उठेर एक व्यक्तिको संस्थाप्रतिको निरन्तर लगावका ऊदाहरणिय पात्र हुन् ऊनि। सन् २०१७ मा एक मानार्थ सदस्यको रूपमा पहिलो इँटा राख्दै सुरु भएको उनको यात्रा, प्रवक्ताको रूपमा समुदायसँग संवादको पुल बनाउँदै, महासचिवको रूपमा संस्थाको जग र स्तम्भहरूलाई बलियो बनाउँदै र उपाध्यक्षको रूपमा सिंगो संरचनालाई नजिकबाट बुझ्दै अघि बढेको छ।

यो क्रमिक र स्वाभाविक यात्रा आफैँमा एक परिपक्व नेतृत्व विकासको दुर्लभ उदाहरण हो। “पारदर्शिता हाम्रो प्रतिवद्धता, सेवा हाम्रो धर्म, उत्तरदायी नेतृत्वका लागि दृढ कदम,” केवल चुनावी नारा जस्तो सुनिँदैन। बरु, यो आठ वर्षको अनुभवबाट निस्किएको एक परिपक्व निष्कर्ष जस्तो लाग्छ। जब एक व्यक्तिले संस्थाको हरेक तह र तप्कालाई नजिकबाट नियालेको हुन्छ, तब मात्र उसले पारदर्शिताको महत्व, सेवाको मर्म र उत्तरदायित्वको गहिराइलाई आत्मसात् गर्न सक्छ। श्रेष्ठको अभियानले यही यथार्थलाई प्रतिविम्बित गरेको छ।

सामाजिक सञ्जालमा देखिने प्रतिक्रियाहरूले पनि यस पटकको निर्वाचनमा मतदाताहरू केवल आश्वासनभन्दा माथि उठेर स्थायित्व र भरोसा खोजिरहेको संकेत गर्दछ। रातारात बन्ने र भत्किने लहरहरूभन्दा, निरन्तरताको बलियो खम्बामा अडेको नेतृत्वले मात्र जापानमा बस्ने हजारौं नेपालीको साझा सपनाको घरलाई सुरक्षित राख्न सक्छ भन्ने विश्वास बलियो हुँदै गएको छ।सिद्धार्थ श्रेष्ठको उम्मेदवारी एक पदको लागि मात्र नभएर, एउटा विचारको प्रतिनिधित्व हो – नेतृत्व रातारात जन्मिदैन, यसलाई समय, समर्पण र धैर्यले जन्माउँछ।

अब जुलाई २७ मा एनआरएनए जापानका मतदाताहरुले केवल एक अध्यक्ष मात्र चुन्ने छैनन्, उनीहरूले आफ्नो संस्थाको भविष्य कस्तो नेतृत्वलाई सुम्पिने भन्ने सोचको छनोट गर्नेछन्।