खोज

सल्यान, २६ असार ।

सल्यानको शारदा नगरपालिकाले मानवजन्य लेदो (दिसा पिसाब) तथा फोहोर व्यवस्थापन सम्बन्धी विशेष कार्यक्रम सञ्चालन गर्ने भएको छ । यस कार्यक्रमका लागि शारदा नगरप्रमुख प्रकाश भण्डारी र नेपाल नगरपालिका सङ्घका अध्यक्ष भीमप्रसाद ढुङ्गानाबिच केही दिन अघि समझदारी पत्रमा हस्ताक्षर भएको नगरपालिकाले जनाएको छ । कर्णाली प्रदेशभरबाट शारदा नगरपालिका मात्रै यो कार्यक्रमका लागि छनोट भएको हो ।

नगरप्रमुख भण्डारीले भने, “यो कार्यक्रमले नगरलाई सफा र व्यवस्थित बनाउने र नागरिकलाई दिसा पिसाबको सुरक्षित व्यवस्थापन बारे पनि सिकाउने हाम्रो अपेक्षा छ ।” कार्यक्रम अन्तर्गत नगरपालिले नेपाल नगरपालिका सङ्घ र प्राविधिक साझेदार संस्थाको सहयोगमा दिसाजन्य लेदो व्यवस्थापन सम्बन्धी ऐन, नियमावली, कार्यविधि, नीति वा योजना पारित गर्नुपर्नेछ । यसै गरी वार्षिक योजना अन्तर्गत सरसफाईतर्फ छुटाइएको बजेटको कम्तीमा १५ प्रतिशत रकम यसै व्यवस्थापन कार्यका लागि खर्च गर्नुपर्ने छ । आवश्यक संरचना निर्माण गर्नका लागि जमिनको पनि व्यवस्थापन नगरपालिकाले गर्नेछ ।

समझदारी पत्र अनुसार नगर कार्यपालिकाको कार्यालयभित्र वातावरण डेस्क स्थापना गरी वातावरण सरसफाई शाखासँग सम्बन्धित कर्मचारीलाई परियोजना फोकल पर्सन नियुक्त गर्नुपर्ने छ । मानवजन्य लेदो तथा फोहोर व्यवस्थापन कार्यक्रम नेपाल नगरपालिका सङ्घको संयोजनमा, खानेपानी मन्त्रालय, खानेपानी तथा ढल व्यवस्थापन विभाग र संयुक्त राष्ट्रसङ्घीय मानव बस्ती कार्यक्रमको सहयोगमा सञ्चालन हुने नगर प्रमुख भण्डारीले जानकारी दिए ।