खोज

जितपुर, १९ असार ।

डेँगुको रोकथाम र नियन्त्रणका लागि कपिलवस्तुको बाणगंगा नगरपालिका–८ मा अभिमुखीकरणसहित लामखुट्टेको बासस्थान पहिचान गरी लार्भा र प्युपा नष्ट गर्ने अभियान सञ्चालन गरिएको छ ।

बुधबार लौगाईमा आयोजित विशेष कार्यक्रममा स्वास्थ्य कार्यालय कपिलवस्तु, वडा कार्यालय र स्थानीय सरोकारवालाको टोलीले विभिन्न क्षेत्रहरूमा पुगेर डेंगु सार्ने लामखुट्टेका लार्भा तथा प्युपा नष्ट गरेका छन् ।

स्वास्थ्य कार्यालय तौलिहवाका मलेरिया इञ्चार्ज रत्नलाल शर्माको सहजीकरणमा सम्पन्न उक्त कार्यक्रममा वडा नं. ८ का स्वास्थ्य संस्था व्यवस्थापन समिति उपाध्यक्ष जुनादेवी थारु, कार्यपालिका सदस्य शारदा परियार, वडा सदस्यहरू विश्वास जि.सी. र शैलेन्द्र बेल्बासे, मोतिपुर स्वास्थ्य चौकी प्रमुख हिमलाल घिमिरे, वडा सचिव गोबिन्द आचार्यसहित विभिन्न क्षेत्रका सरोकारवालाहरूको सहभागिता रहेको थियो ।

स्वास्थ्यकर्मीहरूका अनुसार सन् २०१९ मा धरानमा डेंगुको ठूलो संक्रमण फैलिएको थियो भने कोरोना महामारीको समय केही कम देखिए पनि पछिल्ला वर्षहरूमा यसको प्रभाव पुनः तीव्र रूपमा बढिरहेको छ । स्वास्थ्य मन्त्रालयका अनुसार हालसम्म नेपालभर ३ हजार ५ सय ३० जना व्यक्तिमा डेंगु संक्रमण पुष्टि भइसकेको छ ।

सन् १९७० मा विश्वका केवल ९ देशमा सीमित रहेको डेँगु संक्रमण सन् २००० सम्म आइपुग्दा यो विश्वव्यापी महामारीमा परिणत भएको छ । हाल नेपालसमेत विश्वका धेरै मुलुकमा डेँगु गम्भीर सार्वजनिक स्वास्थ्य समस्याका रूपमा देखा परेको छ ।

नेपालमा सन् २००४ मा पहिलो पटक डेँगुको पहिचान एक विदेशीमा भएको थियो भने सन् २००६ देखि रुपन्देही, बाँकेलगायत तराईका जिल्लामा संक्रमण फैलिन थालेको पाइन्छ । पछिल्लो केही वर्षमा नेपालमा यसको संक्रमण तीव्र गतिमा फैलिँदै गएको छ ।

हालसम्म ७६ जिल्लामा डेँगुको प्रभाव देखिएको छ भने यो रोग विशेष गरी जुनदेखि डिसेम्बरसम्म बढी सक्रिय रहने अध्ययनहरूले देखाएका छन् ।