खोज

बुटवल, १० मंसिर ।

रुपन्देहीमा सत्तारुढ पाँचदलीय गठबन्धन प्रतिनिधि सभातर्फ क्लिव स्वीप भएको छ । प्रतिनिधिसभाका पाँच निर्वाचन क्षेत्र मध्ये क्षेत्र नम्बर १, २ र ५ मा एमाले विजयी भएको छ भने क्षेत्र नं. ३ मा राष्ट्रिय प्रजातन्त्र पार्टी र क्षेत्र नम्बर ४ मा लोकतान्त्रिक समाजवादी पार्टीका उम्मेदवार निर्वाचित भएका छन् ।

१५ पदका लागि २ सय ३ जनाको उम्मेदवारी परेको रुपन्देहीको सबै क्षेत्रमा प्रत्यक्ष तर्फको मतगणना सकिएको छ । सत्ता गठबन्धनको तर्फबाट उम्मेदवार बनेका रुपन्देहीमा प्रतिनिधि सभामा कोही पनि निर्वाचित हुन सकेनन् । क्षेत्र नम्बर १ मा एमालेका छविलाल विश्वकर्मा, क्षेत्र नम्बर २ मा एमालेका विष्णु पौडेल, क्षेत्र नम्बर ३ मा राप्रपाका दिपक बोहरा, क्षेत्र नम्बर ४ मा लोकतान्त्रिक समाजवादीका सर्वेन्द्रनाथ शुक्ला र क्षेत्र नम्बर ५ बाट एमालेकै बासुदेव घिमिरे निर्वाचित भए ।

१० वटा प्रदेशसभाका क्षेत्रमध्ये बहुमत क्षेत्र जितेर एमाले सबैभन्दा ठूलो दल बनेको छ । एमालेले रुपन्देही क्षेत्र नं. १ (१), क्षेत्र नं. २ (१), २ (२), क्षेत्र नं. ३ (२) र क्षेत्र नं. ५ (१) मा गरी पाँच क्षेत्रमा जित हासिल गरेको छ ।

त्यस्तै नेपाली काँग्रेसले क्षेत्र नं. १ (२), क्षेत्र नं. ३ (१) र ४ (२) गरी तीन क्षेत्रमा विजय हासिल गरेको छ ।

त्यस्तै लोसपाले क्षेत्र नं. ४ (१) र जनमत पार्टीले क्षेत्र नं. ५ (२) मा जित हात पारेका छन् ।