खोज

कपिलवस्तु, १० मंसिर ।

कपिलवस्तु जिल्लाको प्रतिनिधिसभा २ को निर्वाचन नेपाली काँग्रेसका लुम्बिनी प्रदेशका महामन्त्री सुरेन्द्रराज आचार्यले जितेका छन । एमाले नेता बृजेश कुमार गुप्तालाई ३ सय १७ मतान्तरले पछाडि पार्दै आचार्यले चुनाव जितेका हुन् ।

मुख्य निर्वाचन अधिकृतको कार्यालय तौलिहवाले प्रकाशित गरेको अन्तिम मत परिणाम अनुसार आचार्यले ३९ हजार १४ मत प्राप्त गर्दै चुनाव जितेका हुन् भने गुप्ताले ३८ हजार ६ सय ९७ मत प्राप्त गरी पराजय व्यहोरे । त्यसैगरी राप्रपाकी सविता शर्माले १ हजार ५ सय ७४ मत प्राप्त गरी तेस्रो हुँदा लोसपाका उमेदवार अकवाल अहमद शाहले १ हजार १ सय ३ मत प्राप्त गरी चौथो बने ।

यो निर्वाचनमा पराजय भोगेका गुप्ताले २०५६ साल यता निरन्तर चुनाव जित्दै आएका थिए । २०७४ सालको निर्वाचनमा गुप्ताले नै आचार्यलाई पराजित गरेको भए पनि यस निर्वाचनमा गुप्ताको पाँचौं पटक निर्वाचित हुने जितको यात्रा रोकिएको छ । उता चौथो स्थानमा आएका नेता शाह लोसपाका प्रभावशाली नेता तथा पुर्व कृषिमन्त्री हुन् । निर्वाचित आचार्य पुर्व सिचाई राज्यमन्त्री हुन् भने पराजित गुप्ता पुर्व कानुनमन्त्री हुन् ।

जिल्लाको प्रदेशसभा २ (ख) मा काँग्रेसका उम्मेदवार सुधाकर पाण्डेय बिजयी भएका छन् । लुम्बिनी प्रदेशका पुर्व शिक्षामन्त्री धर्मबहादुर लाल श्रीवास्तवलाई ८ सय ९१ मतान्तरले हराउँदै पाण्डेय प्रदेशसभा सदस्यमा निर्वाचित भएका हुन् । पाण्डेयले १४ हजार १ सय ८५ मत प्राप्त गरेर चुनाव जित्दा श्रीवास्तवले १३ हजार २ सय ९४ मत प्राप्त गरे ।

त्यसैगरी जसपाका अब्दुल रसिद खाँले ६ हजार ५ सय ५२ मत प्राप्त गरी तेस्रो हुँदा राप्रपाका दुर्गा चौहान १ हजार २ सय ३० मत सहित चौथो भए । प्रदेशसभामा निर्वाचित पाण्डेयले चौथो पटकको निर्वाचनमा जित सुनिश्चित गरेका हुन । यसअघि २०६४ र २०७० सालको पहिलो र दोस्रो संबिधानसभाको निर्वाचनमा बृजेशकुमार गुप्तासँग पराजित भएका पाण्डेयले २०७४ सालको निर्वाचनमा श्रीवास्तव सँग झिनो मतान्तरले पराजय खेप्नु परेको थियो । प्रदेशसभामा निर्वाचित पाण्डेयले यस क्षेत्रका मतदाताको परिवर्तन र बिकासका लागि आफुहरुलाई निर्वाचित गरेको बताउँदै जनचाहना र आफुहरुले घोषणापत्रमा उल्लेख गरेका प्रतिबद्धता पुरा गर्न लागि पर्ने बताए । यस क्षेत्रको समग्र विकासमा ध्यान पु¥याउन र नागरिकका समस्या समाधानमा सधै तत्पर रहने प्रतिनिधिसभामा निर्वाचित आचार्यले प्रतिबद्धता जनाए ।