खोज

जितपुर, ९ मंसिर ।

कपिलवस्तुका क्षेत्र न.१ प्रतिनिधि सभा सदस्यको निर्वाचन क्षेत्रमा यसपटक नेकपा एमालेका उम्मेदवारले क्लिन स्विप गरेका छन् । क्षेत्र नम्बर १ मा बलराम अधिकारी झण्डै दोब्बर मत अर्थात ३४ हजार ६ सय ७५ मत प्राप्त गरेका थिए भने गठबन्धनका साझा उम्मेदवार रहेका माओवादी केन्द्रका सचिव चक्रपाणी खनाल बलदेवले १८ हजार ९ सय ८३ मत ल्याएका थिए । अधिकारीले खनाललाई १५ हजार ६ सय ९२ मतको फराकिलो हराएका हुन् ।

कपिलवस्तु निर्वाचन क्षेत्र नम्बर १ को (क) मा नेकपा एमालेका उम्मेदवार विष्णु पन्थी विजयी भएका छन् । मंसिर ४ गते सम्पन्न प्रतिनिधि सभा तथा प्रदेश सभा चुनावको विहीवार सम्पन्न प्रदेश सभा (क ) को मतगणनामा उम्मेदवार पन्थीले २० हजार २ सय ४७ मत प्राप्त गरी विजयी भएका छन् । यस्तै पन्थीका प्रतिस्पर्धी गठबन्धनका उम्मेदवार डोलकराम घिमिरेले १५ हजार ७ सय ९७ मत प्राप्त गरेका थिए । घिमिरेलाई ४ हजार ४ सय ५० मतले पछाडि पार्दै पन्थी प्रदेश सभामा दोस्रो कार्यकालका लागि विजयी भएका हुन् । आफू निर्वाचित भएपछि पन्थीले सामाजिक सञ्जाल मार्फत सबैलाई धन्यवाद दिएका थिए भने उनले आफ्ना निकट्तम प्रतिद्वन्दी तथा उप विजेता उम्मेदवार डोलकराम घिमिरेको साथ पनि आफूलाई आवश्यक पर्ने बताएका थिए ।

यस्तै कपिलवस्तु क्षेत्र न. १ (ख) एमालेका उम्मेदवार मधुसुधन चौधरीले ११ हजार ७ सय ४८ मत प्रप्त गरेका छन् भने गठबन्धनका उम्मेदवार सहशराम यादवले ९ हजार ६६ मत प्राप्त गरेका थिए । जसमा २ हजार ६ सय ८२ को मतान्तरले एमालेका नेता मधुसुधन चौधरी विजयी भएका हुन् ।

कपिलवस्तु क्षेत्र न. १ मा सत्तारुढ दलहरु नेपाली कांग्रेस, नेकपा माओवादी केन्द्र, राष्ट्रिय जनमोर्चा र नेकपा एकीकृत समाजवादीले प्रतिनिधि सभा सदस्यका लागि गठबन्धन गरेका थिए । यी दलहरुको मतभार जोड्दा नेकपा एमालेको भन्दा बढी थियो । तर गठबन्धनको साझा उम्मेदवार रहेका माओवादी केन्द्रका सचिव चक्रपाणी खनाल बलदेवले सबै दलहरुको मतभारलाई जोड्दा आउने मत पनि ल्याउन सकेनन् । गत बैशाखमा सम्म स्थानीय तहको निर्वाचनको परिणामलाई हेर्दा यहाँ नेपाली कांग्रेसले पाएको मत झण्डै २८ हजर बढी थियो भने माओवादी केन्द्रको मात्रै ८ हजार बढी थियो ।