काठमाडौँ ।
राजधानीको चक्रपथभित्र लगाइएको निषेधाज्ञा हटाइएको छ। जिल्ला प्रशासन कार्यालय काठमाण्डौले सूचना जारी गर्दै चक्रपथ क्षेत्रभित्रका सार्वजनिक स्थानहरूमा लागू गरिएको निषेधाज्ञा अब नलागू हुने जानकारी दिएको हो।
गएको जेठ १८ गते राजावादी समूहको प्रदर्शनलाई मध्यनजर गर्दै प्रशासनले चक्रपथभित्रका सबै सार्वजनिक स्थलमा प्रदर्शन, सभा वा जुलुस गर्न निषेध गरेको थियो। तीन स्थान बाहेक अन्यत्र प्रदर्शनमा रोक लगाइएको यो आदेश अहिले हटाइएको हो।
निषेधाज्ञा हटेसँगै सार्वजनिक गतिविधिहरू सामान्य अवस्थामा फर्कने अपेक्षा गरिएको छ। प्रशासनले नागरिकलाई संयमित ढंगले सार्वजनिक क्षेत्र प्रयोग गर्न आग्रह गरेको छ।
