© 2026
११ कार्तिक २०८३, बुधबार
११ कार्तिक २०८३, बुधबार
काठमान्डौँ ।
ओपनर डाविड मलानको अर्धशतकको मद्दतमा चितवन राइनोजले नेपाल प्रिमियर लिग (एनपीएल) को तेस्रो संस्करणमा विराटनगर किङ्सलाई १५८ रनको लक्ष्य दिएको छ । त्रिवि क्रिकेट मैदानमा टस हारेर पहिले ब्याटिङ गरेको चितवनले निर्धारित २० ओभरमा ३ विकेट गुमाएर १५७ रन बनायो ।
चितवनका लागि मलानले सर्वाधिक ७० रन बनाए । उनले ५१ बलको सामना गर्दै ५ छक्का र ५ चौका प्रहार गरे । यो जारी एनपीएलको पहिलो अर्धशतक हो । मलानले पहिलो विकेटका लागि देव खनालसँग ५८ रनको साझेदारी गरेका थिए । देव १५ बलमा १२ रन बनाएर आउट भए ।
विराटनगरका चरिथ असलंकाले पहिलो विकेट लिएका थिए । विकेटकिपर ब्याटर अर्जुन साउद ९ बलमा ३ रन बनाएर पभेलियन फर्किए । उनी ११औँ ओभरको अन्तिम बलमा एन्जेलो म्याथ्युजको बलमा कप्तान सन्दीप लामिछानेबाट क्याचआउट भए ।
१३औँ ओभरको दोस्रो बलमा आन्द्रे रसेलले मलानलाई आउट गरेपछि चितवनको ब्याटिङ सम्हाल्ने जिम्मेवारी रवि बोपारा र डान मोस्लीले लिए । यी दुईले तेस्रो विकेटका लागि अविजित ६७ रनको साझेदारी गरे ।
रवि ३२ रन र डान २९ रनमा अविजित रहे ।
© 2026
All rights reserved.
Design & Developed By:
