© 2026
२२ आश्विन २०८३, बिहीबार
२२ आश्विन २०८३, बिहीबार
काठमान्डौँ ।
राष्ट्रिय स्वतन्त्र पार्टी (रास्वपा) ले निर्वाचन केन्द्रित घरदैलो अभियानभन्दा फरक ढंगले नागरिकका दैनिक समस्या, गुनासा र अपेक्षा बुझ्न ‘हामी आउँदैछौँ’ अभियान सुरु गरेको छ ।
बुधबार धादिङबेसीमा अभियानको सुरुवात गर्दै रास्वपाका प्रवक्ता तथा प्रतिनिधिसभा सदस्य जगदीश खरेलले राजनीतिक दल र नागरिकबीच नियमित संवाद आवश्यक रहेको बताए ।
निर्वाचनका बेला मात्रै मतदाताको घरदैलोमा पुग्ने परम्पराभन्दा बाहिर निस्केर नागरिकका दैनिक समस्या बुझ्न अभियान सञ्चालन गरिएको उनको भनाइ छ । राज्यको केन्द्रीय संरचना र नागरिकको दैनिक जीवनबीच देखिएको दूरी कम गर्न जनतासँग प्रत्यक्ष सम्पर्क आवश्यक रहेको भन्दै खरेलले नागरिकका गुनासा, सुझाव, आवश्यकता तथा अपेक्षा घरदैलोमै पुगेर सङ्कलन गरिने जानकारी दिए ।
अभियानका क्रममा पार्टीका स्थानीय नेता तथा कार्यकर्तासँग समेत छलफल गर्ने रास्वपाको योजना छ । स्थानीय तहबाट प्राप्त सुझावलाई पार्टीको आगामी नीति निर्माण, संगठन सुदृढीकरण तथा जनप्रतिनिधिको भूमिकालाई प्रभावकारी बनाउन उपयोग गरिने खरेलले बताए ।
अभियानमा खरेलसँगै प्रतिनिधिसभा सदस्य बसुमाया तामाङ, डा। राम लामा तथा केन्द्रीय सदस्य सुशीला कार्की सहभागी छन् ।
रास्वपा धादिङका सभापति राजन अर्यालका अनुसार अभियान टोलीले जिल्लाका विभिन्न स्थानीय तहका बस्ती तथा टोलमा पुगेर नागरिकसँग प्रत्यक्ष भेटघाट गर्नेछ ।
© 2026
All rights reserved.
Design & Developed By:
