सामग्री खोज्नुहोस्

काठमान्डौँ ।

पूर्वाधार विकास मन्त्री सुनिल लम्सालले रसुवाका बाढी प्रभावितलाई सकेसम्म दसैँअघि नै सुरक्षित स्थानमा पुनःस्थापित गर्ने गरी काम भइरहेको बताएका छन् ।

सिंहदरबारमा बसेको हिमालमा जलवायु परिवर्तनको प्रभाव, जलवायु न्याय तथा भोटेकोशी–त्रिशूली विपद्सम्बन्धी संसदीय विशेष समितिको बैठकमा मन्त्री लम्सालले स्थानीय तहसँग समन्वय गरी पुनःस्थापनाका लागि जग्गा पहिचानको काम भइरहेको जानकारी दिएका हुन् ।

चाडपर्वको माहोललाई समेत ध्यानमा राखेर प्रभावितलाई सुरक्षित स्थानमा पुनःस्थापना गर्ने तयारी भइरहेको उनले बताए । स्थानीय तह, विपद् व्यवस्थापन प्राधिकरण र सरकारमार्फत उपलब्ध गराइने राहत तथा क्षतिपूर्तिको समीक्षा गरी समयमै उपलब्ध गराइने उनको भनाइ छ ।

पूर्वाधार विकास मन्त्रालयका सचिव पद्मकुमार मैनालीले रसुवामा बाढीका कारण २ खर्ब २७ अर्ब रुपैयाँ बराबरको क्षति भएको जानकारी बैठकमा दिए ।

क्षति पुगेका २० वटा झोलुङ्गे पुलमध्ये १२ वटाको मर्मत सम्पन्न भइसकेको र बाँकी आठवटाको मर्मत प्रक्रिया अघि बढिरहेको उनले बताए। नुवाकोटको ढुङ्गे–बेत्रावती सडकखण्ड खुला गरी यातायात सञ्चालनमा ल्याइएको छ । बेत्रावतीमा बेली ब्रिज राखेर आगामी सोमबारसम्म धुन्चेसम्मको पहुँच जोड्ने लक्ष्य राखिएको छ ।

त्रिशूली नदीमा जडान गर्न कम्तीमा १०० देखि १२२ मिटरसम्म लामो बेली ब्रिज आवश्यक पर्ने भए पनि उक्त लम्बाइको ब्रिज स्टकमा उपलब्ध नभएकाले अर्डर गरिएको मन्त्री लम्सालले बताए ।

रसुवागढी सडकका विभिन्न स्थानमा चारदेखि पाँचवटा बेली ब्रिज निर्माण गर्नुपर्ने भएकाले दसैँअघि सडकखण्ड पूर्ण रूपमा जोड्न सम्भव नरहेको सचिव मैनालीले जानकारी दिए । बेत्रावती–मेलुङ–स्याफ्रुबेँसीको पुरानो बाटो छाडेर वैकल्पिक मार्गबाट कनेक्टिभिटी अघि बढाउने काम भइरहेको उनले बताए ।

मन्त्री लम्सालले बाढी प्रभावित क्षेत्रमा स्थानीय पहिचान जोगाउने गरी निजी आवास पुनर्निर्माण गरिने बताए। भूकम्पपछिको पुनर्निर्माणमा जस्तो सबै ठाउँमा एकै प्रकारका घर निर्माण नगरी कम्तीमा दुई बेडरुमसहित चारवटा कोठा हुने गरी आवासको मोडल तयार गरिने उनले जानकारी दिए ।

स्थानीय पालिका तथा सर्वसाधारणसँग सहकार्य गरेर पुनर्निर्माण अघि बढाइने बताउँदै उनले जोखिमयुक्त क्षेत्र पहिचान गरी बस्ती बस्न नदिने र आवश्यकताअनुसार असुरक्षित क्षेत्र घोषणा गर्ने नीति लिइने स्पष्ट पारे ।

‘हामी पहिचान जोगिने गरी नै पुनःस्थापना गर्छौँ । मानिसहरूले स्वीकार नै नगर्ने खालका घर बनाउँदैनौँ,’ मन्त्री लम्सालले भने ।

प्रभावित क्षेत्रका ज्येष्ठ नागरिक तथा बालबालिकाको संरक्षण र व्यवस्थापनको जिम्मेवारी सरकारले लिने उनले बताए । बालबालिकाको शिक्षादेखि रोजगारीसम्मको व्यवस्थापनमा समेत सरकारले सहयोग गर्ने उनको प्रतिबद्धता छ ।

जलवायु परिवर्तनका कारण हुने विपद्को जोखिम न्यूनीकरण गर्न पूर्वाधार निर्माण तथा व्यवस्थापनसम्बन्धी नीति र कानुनी व्यवस्था परिवर्तन गर्न लागिएको जानकारी पनि मन्त्री लम्सालले दिए ।

विद्यमान पूर्वाधार निर्माणका मापदण्ड र नदी व्यवस्थापनको अभ्यासका कारण ठूलो क्षति व्यहोर्नुपरेको उल्लेख गर्दै उनले अब उच्च बाढी सतह (हाई फ्लड लेभल), भूमिगत पानीको सतह, नदीमा हुने गेग्रान तथा माटोको निक्षेप र जलवायु परिवर्तनका प्रभावलाई आधार बनाएर नयाँ नीति निर्माण गरिने बताए ।

नदीमा हरेक वर्ष औसत पाँचदेखि १० सेन्टिमिटरसम्म सामग्री जम्मा हुने र त्यसले बाढीको जोखिम बढाउने भएकाले नदीको च्यानल नियमित रूपमा सफा तथा व्यवस्थापन गर्ने कानुनी व्यवस्था गर्न लागिएको उनले जानकारी दिए ।

सहरी विकाससम्बन्धी नयाँ कानुनमार्फत भविष्यका सहर, औद्योगिक क्षेत्र, विद्यालय, अस्पताल, आवास तथा वन क्षेत्रको स्थान निर्धारणमा विपद् जोखिम र जलवायु परिवर्तनलाई समेत आधार बनाइने उनले बताए ।

‘अहिलेको कानुनले वन र निकुञ्ज क्षेत्रका नदीबाट मेटेरियल निकाल्न नदिँदा डिपोजिट भएर डुबानको समस्या हुन्छ । अर्कोतर्फ, केही ठाउँमा ओभर–एक्स्काभेसन हुँदा नदी कटानको समस्या छ । यी दुवै समस्या समाधान गर्न नदीका च्यानलहरूलाई नियमित मेन्टेन गर्ने र मेटेरियल व्यवस्थापन गर्ने कानुनी व्यवस्था गर्दैछौँ, जसले आगामी सदनमा प्रवेश पाउनेछ,’ उनले भने ।

भोटेकोशी–त्रिशूली क्षेत्रमा क्षतिग्रस्त पूर्वाधारको पुनर्निर्माण तत्काल अघि बढाइने मन्त्री लम्सालले बताए। पुरानै स्थानमा राजमार्ग पुनर्निर्माण नगरी सुरक्षित र नयाँ अलाइनमेन्टमा निर्माण गरिने उनको भनाइ छ ।

केही संरचनाको टेन्डर दसैँअघि नै आह्वान गर्ने र बाँकी संरचनाको सम्भाव्यता अध्ययन तथा डीपीआर तयार गरी दसैँ–तिहारपछि चरणबद्ध रूपमा टेन्डर गर्ने तयारी रहेको उनले बताए। खानेपानीका संरचनाको पुनर्निर्माण प्रक्रिया पनि दसैँअघि नै अघि बढाउने तयारी छ ।

विपद्का समयमा सङ्घ, प्रदेश र स्थानीय तहलाई समानान्तर रूपमा परिचालन गर्ने गरी विपद् व्यवस्थापनको संरचना परिमार्जन गर्न कानुनको मस्यौदा तयार भइसकेको मन्त्री लम्सालले जानकारी दिए ।

क्षतिपूर्ति वितरणमा समेत तीनै तहका सरकार र विपद् व्यवस्थापन प्राधिकरणबाट हुने सहायता एकीकृत रूपमा समीक्षा गरिने उनले बताए । विपद्पछि तत्कालीन उद्धार र राहतसँगै वैकल्पिक सडक निर्माण, क्षतिग्रस्त पूर्वाधारको पुनर्निर्माण र दीर्घकालीन पुनःस्थापनालाई एकैसाथ अघि बढाउने तयारी सरकारको रहेको उनले बताए ।